Cash For Job Scam Manikrao Rane

डिचोली: घर नंबरच्या चौकशीसाठी आला आणि माणिकराव राणे याने माझ्यासह इतरांना फसविले, असा गौप्यस्फोट तक्रारदार तथा वन-म्हावळींगेच्या माजी सरपंच शीतल सावळ यांनी आज केला.

कॅश फॉर जॉब घोटाळा प्रकरणात सध्या पोलिस कोठडीची हवा खाणारा माणिकराव राणे याने डिचोलीतील काहीजणांना जॉब देण्याचे आमिष दाखवून चुना लावला आहे.

माणिकरावने माझ्यासह अन्य चौघांना मिळून २१.५० लाखांना गंडा घातल्याची तक्रार शीतल सावळ यांनी केल्यानंतर डिचोली पोलिसांनी शुक्रवारी माणिकराव राणे याला अटक केली आहे. २०२१ साली मी वन-म्हावळींगेची सरपंच असताना माणिकराव राणे एक दिवस पंचायतीत आला. घर क्रमांक मिळविण्यासाठी कोणती प्रक्रिया करावी लागते, अशी चौकशी त्याने माझ्याकडे केली.

बोलता बोलता त्याने, ‘कोणाला सरकारी जॉब हवा असल्यास सांगा. मी जॉब मिळवून देईन.’ असे सांगितले. त्याच्या बोलण्यावर विश्वास ठेवून मी माझ्या मुलाला सरकारी नोकरी मिळवून देण्यासाठी त्याला पैसे दिले. त्यानंतर पूजा येंडे हिच्यासह इतरांनी सरकारी नोकरीसाठी माणिकरावकडे पैसे दिले, अशी माहिती सावळ यांनी दिली.

नोकरी नाही, अन् पैसेही गेले

माझ्यासह फसवणूक झालेल्या अन्य चौघांनी गेली तीन वर्षे सतत माणिकराशी संपर्क साधला. मात्र, नोकरी नाहीच, उलट त्याने पैसेही परत केले नाहीत. माणिकरावने आपली फसवणूक केल्याचे ठाम मत झाल्यानंतर त्याच्याविरोधात डिचोली पोलिसांत तक्रार करण्यात आली, अशी माहिती सावळ यांनी दिली.