Uma Patil Cash For Job

वास्को: पतीला सरकारी नोकरी देण्याचे आमिष दाखवून नादोडा-बार्देश येथील एका महिलेकडून ४ लाख रुपये उकळल्या प्रकरणी उमा पाटील (बायणा- वास्को) हिच्यावर आणखी एक गुन्हा नोंद. दोन दिवसांत तिसरा गुन्हा नोंद. आणखी कारनामे उघडकीस येण्याची शक्यता वास्कोतील नागरिकांकडून वर्तविण्यात येत आहे.

वास्को बायणातील उमा पाटील या महिलेच्या कारनाम्यांची व्याप्ती वाढू लागली आहे. काल गुरुवारी तिच्याविरुद्ध नोकरीचे आमिष दाखवून फसवल्याचा दुसरा गुन्हा दाखल करण्यात आला होता. नातेवाईकाला नौदलात नोकरी मिळवून देण्याचे आमिष दाखवून उमा पाटील हिने बायणातील एका गरीब महिलेकडून १ लाख ७० हजार उकळले होते.

दोन बसेस, दोन कार, दुचाकी जप्त

मूळच्या सुनिता आमोणकर असलेल्या उमा पाटील पूर्वीपासून बायणातीलच रहिवासी आहेत. वास्को पोलिसांनी तिच्याविरुद्ध कारवाई करताना तिच्या दोन बसगाड्या, दोन कार व एक दुचाकी जप्त केली आहे. पोलिस तिच्या अन्य मालमत्तांचाही शोध घेत आहेत.

ऐन पंचवीशीतील असलेल्या आपल्या मुलालाही तिने फसवणुकीच्या धंद्यात ओढल्याचे पोलिस चौकशीत आढळून आले आहे. पोलिस निरीक्षक कपिल नायक यांच्या मार्गदर्शनाखाली वास्को पोलिस उमा पाटील हिच्या फसवणूक प्रकरणांची चौकशी करीत आहेत. सध्या तिला व तिच्या मुलग्याला दोन दिवसांच्या रिमांडवर पोलिस कोठडीत ठेवण्यात आले आहे.