फोंडा: गाळवाडा - प्रियोळ येथील एका घराला लागलेल्या आगीत घरासह आतील चीजवस्तू जळून खाक झाल्या. त्यामुळे मोठे नुकसान झाल्याचा प्राथमिक अंदाज व्यक्त करण्यात येत आहे. ही दुर्घटना गुरुवारी मध्यरात्रीच्या सुमारास घडली. शॉर्टसर्किटमुळे ही आग लागली असावी, असा कयास व्यक्त करण्यात येत आहे.

गाळवाडा - प्रियोळ येथील दामोदर नाईक यांचे हे घर असून या घरात संदेश च्यारी आणि गीता च्यारी हे दाम्पत्य केअरटेकर म्हणून आपल्या दोन मुलांसमवेत राहतात. गुरुवारी ही दुर्घटना घडली त्यावेळी घरात कुणीच नव्हते. त्यामुळे जीवितहानी टळली. मध्यरात्रीच्या सुमारास आग लागल्यानंतर स्थानिकांनी याची माहिती फोन वरून च्यारी कुटुंबाला दिली. त्यानंतर त्यांनी त्वरित घराकडे धाव घेतली.

अग्निशामक दलाला कळविल्यानंतर दलाच्या जवानांनी घटनास्थळी धाव घेतली; पण हे घर उंचावर असल्याने दलाच्या जवानांना तेथे पोचेपर्यंत बरेच सायास करावे लागले. तोपर्यंत स्थानिकांनी आग विझविण्याचे प्रयत्न केले; मात्र आग आणखीनच भडकल्यामुळे घराचे छप्पर तसेच घरगुती वस्तू, सोन्याचे दागिने, पैसे आणि महत्त्वाची कागदपत्रे जळून खाक झाली. स्थानिक पंचायतीने या घटनेचा पंचनामा केला असून पुढील चौकशी केली जात आहे.