पणजी : झुआरी पुलावरुन काल बुधवारी रात्री बाजूची रेलिंग तुटल्याने एक कार प्रवाशांसह नदीत कोसळून अपघात झाला. ही अपघातग्रस्त कार बाहेर काढण्यात नौदलासह शोधकार्यात गुंतलेल्या यंत्रणांना यश आलं आहे. काल रात्री अपघातानंतर झुआरी पुलावर शोधकार्य सुरु होतं यासाठी नौदलाची मदतही घेतली जात होती. अग्निशमन आणि आपत्कालीन कर्मचार्‍यांसह वेर्णा आणि आगशी पोलिसांकडून शोधकार्य सुरु होतं. आता काळ्या रंगाची डस्टर कार बाहेर काढण्यात आली आहे.

क्रेनच्या साहाय्याने ही डस्टर कार बाहेर काढण्यात आली आहे. कारचा पूर्णपणे चेंदामेंदा झाल्याचं हाती आलेल्या दृष्यांवरुन स्पष्ट दिसत आहे. या कारमध्ये मृतदेह दिसत असल्याची माहिती आहे. हा अपघात एवढा भीषण होता की कारमधील कुणीही या अपघातातून वाचू शकलं नसल्याची माहिती आहे. कारला फेरीबोटमध्ये ठेवण्यात आलं असून आता कारमधील मृतदेह बाहेर काढून त्यांना उत्तरीय तपासणीसाठी गोमेकॉ रुग्णालयात पाठवलं जाणार आहे. सकाळपासूनच याठिकाणी बघ्यांची मोठी गर्दी पाहायला मिळत आहे.

झुआरी पुलावर रात्रीपासून अपघातग्रस्त कारसाठी शोधकार्य सुरू होते मात्र काळोख असल्याने शोधकार्य सुरू ठेवण्यात अडचणी येत होत्या. दरम्यान तटरक्षक दल आणि नौदल डायव्हर्सशी संपर्क साधण्यात आला होता. हे वाहन पणजीकडून मडगावच्या दिशेने येत होते. या वाहन चालकाने पुलावर ब्रेक मारल्याने त्याच्या खुणा रस्त्यावर दिसत असून ती उजव्या बाजूला वळल्याच्याही खुणा आहेत. आता ही अपघातग्रस्त कार बाहेर काढण्यात प्रशासनाला यश आलं आहे.