डिचोली: काळ आला होता; पण वेळ आली नव्हती. या म्हणीचा प्रत्यय आज डिचोलीत आला. डिचोली-साखळी रस्त्यावरील कारापूर येथे एक कार रस्त्यापासून जवळ असलेल्या खोल दरीत कोसळली. या अपघातात सुदैवाने मोठा अनर्थ टळताना कारचालकासह कारमधील तिघे युवक सुखरूप बचावले.

या अपघातात बचावलेले तिघेही युवक होंडा-सत्तरी येथील असल्याची माहिती मिळाली आहे. अपघातानंतर तिन्ही युवकांनी भीतीने घटनास्थळावरून पलायन केले. हा अपघातात कारापूर येथील ‘ग्रीन एकर्स’ परिसरात अपघात प्रवण क्षेत्रात घडला.

यासंबंधीची माहिती अशी की, होंडा येथील तिघेजण कारमधून डिचोलीच्या दिशेने जात होते. कारचे टायर बदलण्यासाठी डिचोली येथे जात असताना हा अपघात घडला. कारापूर-तिस्कहून काही अंतरावर असलेल्या उतरणीवर चालकाचे नियंत्रण गेल्याने कार डाव्याबाजूने रस्त्याबाहेर जाऊन दरीत कोसळली.

ही कार एका झाडाच्या फांदीला अडकून राहिली. तसेच त्याठिकाणी असलेल्या वीज खांबाला कारची धडक बसली असती, तर अनर्थ घडला असता. अपघातानंतर सायंकाळीच कार अपघात स्थळावरून हलविण्यात आली.