बोरी: अपघातप्रवण भागातील बोरी सर्कल येथे 1 एप्रिल रोजी एका कँटरने ट्रकला धडक दिल्याने झालेल्या जबरदस्त अपघातातील कँटर गेल्या पाच दिवसांपासून रस्त्यावरच आहे. या कँटरने रस्ता अडविल्याने बोरी सर्कलच्या रस्त्यावरील वाहतुकीला अडथळा निर्माण झाला आहे.

बोरी नव्या पुलाच्या जोड रस्त्यावरील पाच संरक्षक बेटांच्या चोहोबाजूंनी जाणारा रस्ता हा गावातील प्रमुख अपघाताचे ठिकाणी बनलेला आहे. या संरक्षक बेटावर वारंवार लहान मोठे अपघात घडतात.

1 रोजी पहाटे वास्को येथून बेळगावच्या दिशेने जाणारा एमएच 04 एफ यू 3305 या क्रमांकाच्या कँटरने समोरून जाणाऱ्या मालवाहू ट्रकवर जोरदार धडक दिल्याने या कँटरच्या दर्शनी भागाचे नुकसान झाले. त्यानंतर फोंडा पोलिसांनी हा कँटर क्रेन आणून थोडा बाजूला हटवला, तरीही तो अर्धाअधिक रस्ता अडवून आहे. त्यामुळे दोन्ही बाजूंनी येणाऱ्या वाहनांना बाजू देता येत नाही.

बोरी पुलावरून वास्को बंदरातून येणाऱ्या मालाची ने आण करणारी अवजड मालवाहू वाहने तसेच इंधन घेऊन बेळगाव, हुबळी, कोल्हापूर आदी भागात जाणारे टँकर याच उतरणीच्या रस्त्यावरून फोंडामार्गे राज्याच्या अन्य भागात जातात. हा कँटर रस्त्यावर असल्याने मोठी अडचण निर्माण झाली आहे. संबंधितांनी हा कँटर येथून हटवून रस्ता मोकळा करावा. अन्यथा या ठिकाणी आणखीही अपघात घडण्याची शक्यता आहे.