Cancer Screening Mission Goa

पणजी: कर्करोगामुळे बळी जाणाऱ्यांची संख्‍या दिवसेंदिवस वाढत चालली आहे. या रोगाचे निदान लवकर व्‍हावे यासाठी सरकारने कॅन्सर स्क्रीनिंग अभियान सुरू केले आहे. नुकतेच ते मंडूर, वाळपई, कुडचडे, साखळी आणि काणकोण येथे राबविण्‍यात आले. त्‍यास उदंड प्रतिसाद मिळाला. एकूण १०५७ जणांनी तपासणी करून घेतली. त्‍यात २९१ पुरुष आणि ७६६ महिलांचा समावेश होता. दरम्‍यान, सोमवार दि. २८ ऑक्टोबर रोजी सकाळी ९ वाजता कुडतरी येथे अवर लेडी ऑफ कार्मेल हायस्कूलमध्‍ये हे शिबिर होणार आहे.

कॅन्सर स्क्रीनिंग अभियानाचा लाभ घेऊन लवकर निदानास प्राधान्य देण्याचे आणि या मोफत स्क्रीनिंग शिबिरात सहभागी होण्याचे आवाहन अभियानाचे प्रमुख डॉ. जगदीश काकोडकर यांनी केले आहे. कर्करोगाचे लवकर निदान झाल्यास जीव वाचवता येतो, असेही त्‍यांनी सांगितले.

शिबिरात तपासणी करताना दोन रुग्णांमध्ये कर्करोग आढळून आला. त्यांच्यावर सध्या उपचार सुरू आहेत. शिवाय ५५ सौम्य स्तन गाठी आढळल्या. प्रारंभिक अवस्थेतील ग्रीवा कर्करोगाचा एक रुग्ण आढळून आला असून १३ रिपोर्ट अद्याप प्रलंबित आहेत. प्रोस्टेट कर्करोगाचाही एक रुग्ण आढळला आहे. तर, एक ओरल कर्करोगाचा रुग्ण आणि १४ प्रीमॅलिग्नंट प्रकरणे आढळून आली.