काणकोण येथील मुलीवर लैंगिक अत्याचार केला असल्याची धक्कादायक घटना समोर आली आहे. आरोपीने पीडितेला धमकावत ब्लॅकमेल केले असून लैंगिक अत्याचार केला असल्याची तक्रार काल दिनांक 19 सप्टेंबर रोजी काणकोण पोलिसात केली आहे.

पीडितेने काणकोण पोलिसात दाखल केलेल्या तक्रारीनुसार काणकोण येथील प्रवीण गावकर या आरोपीने आपण पीएसआय असल्याचा बनाव केला. पीडितेशी संबंध प्रस्थापित केले व कालांतराने पीडितेला तिच्या संमतीशिवाय एका खोलीत घेऊन जात अश्लील चित्रफित दाखवली व लैंगिक अत्याचार केल्याची बाब समोर आली आहे.

पीडितेने म्हटले आहे की, आपल्याला एका खोलीत नेऊन बलात्कार केला व आपले विवस्त्र अवस्थेतील फोटो काढले व त्याचा वापर करत आपल्याला ब्लॅकमेल केले. त्यानंतर ब्लॅकमेल करत अनेक वेळा माझ्यावर लैंगिक अत्याचार केला आहे.

आरोपी गावकर याने पीडितेकडून सुमारे 65 हजार रुपये ही उकळले असून धमकी देत ब्लॅकमेल केल्याच्या आरोपा केला आहे. काणकोण पोलिसांनी याबाबत तक्रार दाखल केली असून गुन्हा नोंद करण्याचे काम बराच वेळ सुरु आहे.

आरोपीला अद्याप पोलिसांनी ताब्यात घेतले नसले तरी लवकरच घेण्यात येणार असल्याची माहिती पोलिसांनी दिली आहे. याबाबत काणकोणचे पोलिस निरीक्षक चंद्रकांत गावस यांनी सांगितले की, या लैंगिक अत्याचार प्रकरणात महिला पोलिस उपनिरीक्षक रिफा बार्रेटो पुढील तपास करीत आहे.