Canacona Garbage :

आगोंद, काणकोण पालिकेच्या कचरा प्रक्रिया प्रकल्पापासून जवळच असलेल्या दुमाणे येथील कचरा साफ करून स्थानिकांनी आदर्शवत उदाहरण घालून दिले.

पालिका प्रशासन कचऱ्याकडे दुर्लक्ष करत असल्यामुळे शनिवारी स्थानिक नागरीकांनी ही मोहीम राबविली. या कामांत गौरेश कोमरपंत, उदय कोमरपंत, पर्यटक माल्कम, जेनी, मिलाग्रिना, कैनी, मेल्विन, सुप्रिया नाईक, रोहिश कोमरपंत, सतिश कोमरपंत, निशा कोमरपंत, शुभम कोमरपंत, उर्वेश कोमरपंत, शिवा नाईक, कृष्णा नाईक, या नागरिकंचा समावेश‌ होता.

दुमाणे येथील स्थानिक व आगोंद ते काणकोणचा प्रवास करणाऱ्या प्रवाशांना, वाहनचालकांना दुर्गंधीमुळे त्रास सहन करावा लागत होता. पावसाळ्यात येथील दुर्गंधीयुक्त व प्रदुषित पाणी विहिरी व आगोंद नदीतून समुद्रात जाते.

काणकोण पालिकेचे या प्रश्नांकडे गेल्या अनेक दिवसांपासून दुर्लक्ष होत असल्याची प्रतिक्रिया उदय कोमरपंत यांनी व्यक्त केली.

दुर्गंधीमुळे आगोंद ते काणकोण मार्गावरील प्रवास नकोसा झाला होता. कचरा प्रक्रिया प्रकल्प ५० मीटर आत असला तरी मुख्य रस्त्यावर मोठ्या प्रमाणात कचरा साचलेला आहे. याप्रश्नी लोकप्रतिनिधींना आपली जबाबदारी टाळता येणार नाही. केंद्र सरकारचा स्वच्छ पालिका पुरस्कार लाभल्यामुळे नगरपालिका मंडळाने याप्रकरणी गांभीर्याने लक्ष घालणे गरजेचे आहे, असे गौरीश कोमरपंत म्हणाले.

हा कचरा रेस्टॉरंटचा

आगोंद ते काणकोण या मुख्य रस्त्यावर कमी लोकवस्तीच्या ठिकाणी कचऱ्याच्या गोण्या फेकून पळ काढणारे अनेक जण आहेत. समुद्र किनाऱ्यावरील रेस्टॉरंटचा कचराही येथे मोठ्या प्रमाणात फेकला जातो. त्या गोण्या उघडून तपासल्या तर एक तर बील‌ किंवा इतर वस्तू कुणाच्या आहेत हे स्पष्ट होणार असल्याचे सुप्रिया नाईक यांनी सांगितले.

तक्रारीकडे काणाडोळा

कचराप्रश्नी तक्रार केली तरी याबात असंवेदनशील प्रत्त्युत्तरे दिली जातात. काणकोण पालिकेचे कर्मचारी गेटजवळ वाहनातील कचरा दुस-या वाहनात टाकताना सांडलेला कच-याला हात लावत नाही. त्या ठिकाणी अन्य काहीजण कचरा टाकत असतात, अशामुळे कचऱ्याचे ढीग साचतात, उदय कोमरपंत यांनी सांगितले.