काणकोण: काणकोण पालिकेला नुकताच स्वच्छ पालिका पुरस्कार मिळाला; मात्र प्रत्यक्षात पालिकेच्या चावडी वार्डात घाणीचे साम्राज्य पसरलेले असून दुर्गंधीयुक्त गटारामुळे परिसरातील नागरिक आणि विक्रेत्यांचे हाल होत आहेत. या पार्श्वभूमीवर महिलांनी आवाज उठवला असून नगरसेवक धिरज नाईक गावकर यांनी स्वखर्चाने गटार स्वच्छ करून पालिकेला जाग आणली आहे. या प्रकाराबद्दल ग्रामस्थांत संताप व्यक्त करण्यात येत आहे.

शनिवारचा आठवडी बाजार ज्या ठिकाणी भरतो, त्याच ठिकाणी गटार वाहत होते. गटारातून उग्र वास येत होता, त्यात किडे वळवळत होते. नागरिकांच्या आरोग्याला गंभीर धोका निर्माण झाल्यानंतर नगरसेवक नाईक गावकर यांनी जेसीबी लावून संपूर्ण गटार साफ केले. तब्बल दहा पिशव्यांइतका प्लास्टिक कचरा गटारातून काढण्यात आला.

या बाजाराच्या अगदी जवळच दहा वर्षांपूर्वी सुमारे सात कोटी रुपये खर्चून भाजी मार्केटची सुसज्ज इमारत उभारण्यात आली. तळमजल्यावर भाजी विक्रेत्यांसाठी सोपोर आणि वरच्या मजल्यावर व्यापारी आस्थापनांसाठी जागा उपलब्ध असूनही ही इमारत आजही विना वापर पडून आहे. या गाळ्यांना भाडेपट्टीवर दिल्यास पालिकेच्या तिजोरीत कोट्यवधी रुपयांचा महसूल जमा होऊ शकला असता, असा आरोप स्थानिकांनी केला आहे.

पालिका इमारतीसमोरच असलेल्या जुन्या इमारतीचा स्टेबिलिटी रिपोर्ट निगेटिव्ह आल्याचे कारण देत पालिका कार्यालय दोन वर्षांसाठी खाजगी इमारतीत हलविण्यात आले. या स्थलांतरासाठी पालिकेने दरमहा तब्बल पन्नास हजार रुपये भाडे दिले. या इमारतीच्या तळमजल्यावर २० हून अधिक दुकाने असूनही ती रिकामी करण्याचा आदेश पालिकेने दिला नाही. पालिका आपल्या कार्यालयाचे स्थलांतर मात्र तातडीने करते, मात्र दुकानदारांविरुद्ध मात्र कारवाई टाळते, अशी टीका माजी मुख्याध्यापक शांताजी नाईक गावकर यांनी केली.

महिला आक्रमक

गटाराच्या दुर्गंधीमुळे महिलांनी पालिकेविरोधात आक्रमक भूमिका घेतली असून तातडीने स्वच्छतेची कायमस्वरूपी व्यवस्था करावी, अशी मागणी केली आहे. अन्यथा तीव्र आंदोलनाचा इशारा स्थानिक महिलांनी दिला आहे.