काणकोण: काणकोणातील पारंपरिक शिमगोत्सवाला बुधवारी नमनाने विधीवत प्रारंभ झाला असून होळी पौर्णिमेला मांड मोडून उत्सवाची सांगता होणार आहे.

घुमट, शेमेळ, झांज यांसह सनई-सुर्त यांच्या सुरावटींनी शिमग्याची रंगत वाढते. मात्र, स्थानिक वादक दुर्मिळ झाल्याने शिमगा मेळांना माजाळी (कारवार) येथील कलाकारांवर अवलंबून राहावे लागत आहे.

२५ वर्षांपूर्वी ही साथ स्थानिकांकडून मिळत होती; पण परंपरा पुढे न गेल्याने आज बाहेरील कलाकारांना दशमी ते होळीपर्यंत साथ द्यावी लागते. सहा दिवसांसाठी त्यांना मानधनही दिले जाते. मेळ अंगणात आल्यानंतर तालगडी व आरतीवेळी सनई-सुर्त महत्त्वाची ठरते.

लोलये गावात हिरामेळ, जल्मीमेळ, तानशीकार, शेळकार, कोळकणकार व कारयकार असे सहा मेळ कार्यरत आहेत. हिरामेळ हा देवाचा मेळ मानला जातो; तो बाहेर पडल्यानंतरच अन्य मेळांचा गावात संचार सुरू होतो.

दशमीला ग्रामदैवत श्री केशव देवालयात सर्व मेळ एकत्र येऊन डोंगरवाटेने बोरूस-इडदरकडे प्रस्थान करतात. पोळे ते बोरूस-इडदर परिसरातील विविध वाड्यांवर फेरफटका मारून होळी दहनाने उत्सवाची सांगता होते.