Canacona Lokotsava 2024 Opening CM Pramod Sawant Speech

पणजी: काणकोण येथे डेअरी फार्म उभारण्याचे सभापती रमेश तवडकर यांचे स्वप्न असून आम्ही केंद्राकडे तसा प्रस्ताव पाठविला आहे. त्याला लवकरच मंजुरी मिळेल, असा विश्वास मुख्यमंंत्री डॉ. प्रमोद सावंत यांनी व्यक्त केला. काणकोणवासीयांचे सहकार्य लाभले आणि जागा उपलब्ध झाली तर मच्छीमार प्रकल्पांतर्गत ३०० मच्छीमारांचा रोजगाराचा प्रश्न सुटेल तसेच त्यांना पारंपरिक आणि अत्याधुनिक मासेमारीबाबतही मार्गदर्शन मिळेल, असेही मुख्यमंत्र्यांनी आज सांगितले.

काणकोण येथे आयोजित ‘लोकोत्सव-२०२४’च्या उद्‌घाटन समारंभात मुख्यमंत्री बोलत होते. सावंत यांनी या कार्यक्रमात सरकारतर्फे राबविण्यात येणार विविध योजनांवर प्रकाशझोत टाकला. सरकारतर्फे रोजगाराच्या विविध संधी उपलब्ध करण्यात येतील. युवकांनी केवळ सरकारी नोकऱ्यांच्या पाठीमागे न धावता नव्या संधीचा लाभ घ्यावा, असे आवाहनही त्यांनी यावेळी केले.

पंतप्रधान नरेंद मोदी यांनी युवकांसाठी ‘मेरा भारत महान’ हे खास पोर्टल सुरू केले आहे. गोव्यातील युवकांनी या पोर्टलवर नावनोंदणी करावी आणि त्याचा लाभ घ्यावा. आयटीआय आणि इतर काैशल्य पदवीप्राप्त युवकांनी रोजगार मोहिमेस हातभार लावावा, असे आवाहन मुख्यमंत्र्यांनी यावेळी केले.

‘समृद्ध काणकोण’चे कौतुक

‘डेअरी फार्मिंग’ या प्रकल्पासाठी सभापती तवडकर आग्रही आहेत. हा प्रकल्प लवकरच मार्गी लागेल. तालुक्यातील युवकांना रोजगार उपलब्ध व्हावा, यासाठी ते सतत प्रयत्नरत आहे. त्यांच्या ‘समृद्ध काणकोण’ या स्तुत्य कार्यक्रमाचे मी खास काैतुक करतो. प्रत्येक तालुक्यात असा आदर्श प्रकल्प राबवायला हवा, असेही मुख्यमंत्र्यांनी यावेळी सांगितले.