काणकोण पालिका क्षेत्रातील अनधिकृत भंगारअड्डे हटवावेत, या मागणीसाठी नगरसेवक धीरज नाईक गावकर यांनी मंगळवारी (ता.२३) उपोषण करण्याचा इशारा देताच सरकारी यंत्रणा जागी झाली. याविषयी आज (ता.२२) काणकोणचे उपजिल्हाधिकारी मधू नार्वेकर यांनी तातडीने संयुक्त बैठक घेतली.

या बैठकीला मुख्याधिकारी रमेश गावकर, पालिका अभियंता दिलखुश गावकर, पोलिस निरीक्षक हरीश राऊत देसाई व नगरसेवक धीरज नाईक गावकर उपस्थित होते. अनधिकृत भंगारअड्डे एका महिन्यात हटविण्याचे आश्वासन दिल्यानंतर नगरसेवक धीरज नाईक गावकर यांनी मंगळवारी (ता.२३) नियोजित उपोषण मागे घेण्याचा निर्णय घेतला. मात्र, एका महिन्यात हे भंगारअड्डे न हटविल्यास उपोषण करणार असल्याचे संयुक्त बैठकीनंतर धीरज नाईक गावकर यांनी सांगितले.

दरम्यान, काणकोण पालिका क्षेत्रातील भंगारअड्ड्यांवर गेले चार महिने प्रत्येक पालिका बैठकीत आवाज उठवूनही पालिका प्रशासन काहीच कारवाई करत नाही म्हणून सुस्त पालिका प्रशासनाच्या विरोधात मंगळवारी उपोषण करणार असल्याचे निवेदन नगरसेवक धीरज नाईक गावकर यांनी उपजिल्हाधिकारी, पोलिस उपअधीक्षक व पालिका प्रशासनाला दिले होते.

मुख्याधिकाऱ्यांकडून विनंती

यासंदर्भात पालिका मुख्याधिकाऱ्यांना विचारले असता अनधिकृत भंगारअंड्यांना नोटिसा पाठवून दिल्या असल्याचे त्यांनी सांगितले. मंडळाच्या सदस्यांनी घेतलेल्या निर्णयाची अंमलबजावणी करणार असल्याचे नगराध्यक्ष सारा नाईक देसाई यांनी सांगितले.

मात्र, सध्या विधानसभा सुरू असल्याने उपोषणाचा निर्णय मागे घ्यावा, अशी विनंती नव्यानेच मुख्याधिकारीपदाचा ताबा घेतलेले रमेश गावकर यांनी आपल्याला व आपल्या समर्थकांना केल्याचे नगरसेवक धीरज नाईक गावकर यांनी सांगितले.

कारवाई कधी करणार?

पालिका क्षेत्रात ९ अनधिकृत भंगारअड्डे आहेत. ११ मार्चला झालेल्या पालिका मंडळाच्या बैठकीत या अनधिकृत भंगारअड्ड्यांविरुद्ध कारवाई करण्याचा ठराव सर्वानुमते घेण्यात आला होता. मात्र, त्या ठरावाची अंमलबजावणी होत नसल्याने उपोषण करण्याचा निर्णय घेतला होता, असे नगरसेवक नाईक गावकर यांनी सांगितले.