काणकोण: कारवार-मडगाव महामार्गावर माशे-दापट येथे बुधवारी सकाळी कार व दुचाकीमध्ये झालेल्या भीषण अपघातात प्राध्यापिका सुचिता बांदेकर (२७) यांचा जागीच मृत्यू झाला. या घटनेमुळे लोलये परिसरात हळहळ व्यक्त होत आहे.

सुचिता या शेळी येथून श्री मल्लिकार्जुन महाविद्यालयात दुचाकीने जात असताना समोरून कर्नाटकच्या दिशेने येणाऱ्या केए ३० एम ८१९७ या कारने चुकीच्या बाजूने येत त्यांच्या दुचाकीला जोरदार धडक दिली. धडकेची तीव्रता इतकी होती की दुचाकीचा अक्षरशः चेंदामेंदा झाला. त्या कारच्या काचावर आपटून पुढे फरफटत गेल्या. या भीषण अपघातात त्यांचा जागीच मृत्यू झाला.

अपघात इतका जबरदस्त होता की कारचे एअरबॅग फुटले असून वाहनाचे मोठे नुकसान झाले. काणकोण पोलिसांनी कार चालकाला ताब्यात घेतले असून या घटनेचा तपास काणकोण पोलिस करत आहेत.

नाट्य क्षेत्रातही सक्रिय

सुचिता बांदेकर या श्री मल्लिकार्जुन महाविद्यालयात कोंकणी विषयाच्या तासिका प्राध्यापिका होत्या. त्या नाट्य क्षेत्रातही सक्रिय होत्या. त्या कुटुंबातील एकमेव कमावत्या होत्या. बारावीत असताना वडिलांचे निधन झाल्यानंतर त्यांच्या आईने मोठ्या कष्टाने त्यांना शिक्षण दिले. घरची जबाबदारी सांभाळत त्या उभ्या राहिल्या होत्या, असे शेळी प्रभागाचे पंच सचिन नाईक आणि दामोदर विद्यालयाचे मुख्याध्यापक जितेंद्र आमशेकर यांनी सांगितले.