कळंगुट: कळंगुट, कांदोळी, पिळर्ण, रेईश मागूश, नेरूल आणि साळगाव परिसरातील पाणीटंचाईवर उपाय म्हणून जलस्रोत खात्याने उभारलेल्या ३० एमएलडी क्षमतेच्या कच्च्या पाण्याच्या पंपिंग स्टेशनचे बुधवारी (ता. ७) लोकार्पण होणार आहे. मुख्यमंत्री डॉ. प्रमोद सावंत यांच्या हस्ते व जलस्रोत मंत्री सुभाष शिरोडकर यांच्या उपस्थितीत सायंकाळी ४.३० वाजता कळंगुट येथील पंपिंग स्टेशनच्या ठिकाणी हा कार्यक्रम होईल.

या प्रकल्पामुळे पिळर्ण औद्योगिक वसाहतीसह या भागातील सुमारे ७५ हजार रहिवाशांना तसेच मोठ्या संख्येने येणाऱ्या पर्यटकांना फायदा होणार आहे. अस्नोडा जलशुद्धीकरण केंद्रातून सध्या या भागाला २७ एमएलडी पाणीपुरवठा होतो, तर मागणी ३८.८ एमएलडी आहे. त्यामुळे असलेली तूट या प्रकल्पामुळे भरून काढण्यास मदत होणार आहे.

या प्रकल्पासाठी नाबार्डकडून १३.७९ कोटी रुपयांचा निधी मिळाला असून, मे. शेठ अँड सुरा इंजिनिअर्स प्रा. लि. यांनी सुमारे १६.२० कोटी रुपये खर्चून काम पूर्ण केले आहे. तिळारी कालव्याच्या कळंगुट वितरिकेतून कच्चे पाणी उचलून ते पिळर्ण औद्योगिक वसाहतीतील वितरण टाकीपर्यंत पोहोचविण्यात येणार आहे.

योजनेमुळे होणार अनेक फायदे

योजनेमुळे हॉटेल्स, उद्योग आणि निवासी संकुलांकडून होणारा भूजल उपसा कमी होण्यास मदत होईल. तसेच जीआयडीसी पिळर्णची ३ एमएलडी आणि सार्वजनिक बांधकाम खात्याची घरगुती वापरासाठीची ३० एमएलडी कच्च्या पाण्याची दीर्घकाळापासूनची मागणी पूर्ण होणार आहे.

पूर्ण क्षमतेने पंपिंग स्टेशनमधून दररोज ३० एमएलडी कच्चे पाणी पुरविले जाणार आहे. तिळारी पाटबंधारे प्रकल्प हा महाराष्ट्र आणि गोवा यांचा संयुक्त प्रकल्प असून, त्याची एकूण वहन क्षमता ३२० एमएलडी आहे. त्यापैकी १०० एमएलडी पाणी घरगुती आणि औद्योगिक वापरासाठी राखीव आहे.