Calangute police action against beach troublemakers

म्हापसा: समुद्रकिनाऱ्यांवर येणाऱ्या पर्यटकांना लक्ष्य करीत, त्यांना नाहक त्रास देणाऱ्या बेकायदेशीर दलालांचे शुक्लकाष्ठ संपलेले नाही. याच पार्श्वभूमीवर, शनिवारी कळंगुट पोलिसांनी किनाऱ्यांवर फिरणाऱ्या २४ जणांविरुद्ध गुन्हा नोंद केला. यामध्ये पाच दलाल तसेच सार्वजनिकस्थळी त्रास निर्माण करणारे अकरा जण तर आठ भिकाऱ्यांवर ही कारवाई करण्यात आली.

यातील पहिल्या उल्लंघनकर्त्यांना पाच हजार रुपयांचा दंड वसूल केला तर दुसऱ्यांदा गुन्हा करणार्‍यांकडून तब्बल ५० हजार रुपयांचा दंड आकारला आहे. राज्यात येणाऱ्या पर्यटकांच्या सुरक्षेसाठी पोलीस कटिबद्ध असल्याचे पोलिसांनी म्हटले आहे. पर्यटकांच्या सुरक्षेच्या अनुषंगाने कळंगुट पोलिसांनी अवैध पद्धतीने कार्यरत दलाल किंवा किनाऱ्यांवर गोंधळ घालून इतरांना त्रास देणाऱ्यांवर ही कारवाई यापुढे सुरुच राहील असे पोलिसांनी स्पष्ट केले आहे.

कळंगुट किनाऱ्यावर दिवसेंदिवस दलालांच्या संख्या वाढत असून, पर्यटकांना हेरुन हे अनधिकृत दलाल लोकांची फसवणूक अन् लुबाडणूक करीत असल्याचे समोर आले आहे. सर्वच स्थानिक लोकप्रतिनिधींकडून याबाबत चिंता व्यक्त करण्यात आली आहे.