Calangute Beach: जगप्रसिध्द कळंगुट किनाऱ्यावर देशी पर्यंटकांनी नववर्षाची सुट्टी घालवण्यासाठी गर्दी केलेली आहे. विदेशी पर्यटक कमी असले तरी स्थानिक व देशी पर्यंटक कुटुंबीयांसमवेत मोठया संख्येने दाखल झालेले आहेत. काही प्रमाणात विदेशी पर्यटकही आलेले आहेत. त्यामुळे किनारी भागातील हॉटेल तसेच इतर परिसरातील हॉटेलमध्ये पर्यटक उतरलेले आहेत.

मुलांच्या शाळांना सुट्ट्या पडलेल्या आहेत. त्यामुळे त्यांच्या पालकांनीही सुट्या घेऊन यंदाही नाताळची सुट्टी गोव्यात घालवणे पसंत केले आहे. कळंगुट, बागा, हणजूण, कांदोळी या बार्देश तालुक्यातील महत्वाच्या समुद्र किनारी पर्यटक लाखोंच्या सख्येने उतरलेले आहेत.

विदेशी पर्यटक अजून म्हणावे तसे आलेले नसले तरी काही दिवसात येतील, असे व्यावसायिकांनी गृहीत धरले आहे. कळंगुट, बागा, कांदोळी, हणजूण किनारी शॅक उभारणे, पलंगांची व्यवस्था करणे सुरू आहे. काही पर्यंटकांची किनारी भागात हॉटेलमध्ये वस्ती आहे तर, काहींनी म्हापसा, पणजी येथे वास्तव्य केले आहे.

म्हापसा मार्केटला पर्यटकांची भेट

देशी व विदेशी पर्यटक गोव्यात येतात. त्यावेळी ते उत्तर गोव्यातील प्रमुख म्हापसा पालिका मार्केटला भेट दिल्याशिवाय जात नाहीत. या मार्केटमध्ये सर्व तऱ्हेच्या वस्तू मिळतात त्या खरेदी करण्यासाठी हे पर्यटक आवर्जून येतात. त्यामुळे पर्यटकाची म्हापसा मार्केटमध्येही गर्दी झालेली असते.