पणजी: कोविड-19 ची तिसरी लाट जवळपास ओसरली आहे. मागील 2 वर्षात कोरोनामुळे गोव्यातील पर्यटन उद्योगक्षेत्राला मोठा आर्थिक फटका बसला आहे. परिणामी 29 डिसेंबर 2021 पासून राज्यात लागू असलेल्या कसिनो, रिव्हर क्रूझ, बार, रेस्टॉरंट्स इत्यादींवरील 50% क्षमतेचे निर्बंध हटवण्याची मागणी पर्यटन क्षेत्राशी निगडीत लोक करत आहेत.

ट्रॅव्हल अँड टुरिझम इंडस्ट्री असोसिएशन ऑफ गोवाने (TTAG) निवेदनाद्वारे राज्य सरकार आणि पर्यटन मंत्रालय, नवी दिल्ली यांना निर्बंध हटवण्याची मागणी केली आहे. “पर्यटन उद्योगावरील निर्बंध कमी करण्याआधी सकारात्मकता दर कमी होणे आवश्यक असल्याचे सरकारने यापूर्वी सांगितले होते. आता सकारात्मकता दर 2.62% पर्यंत खाली आला आहे आणि कोविड (COVID-19) परिस्थिती जवळजवळ सामान्य आहे. आम्हाला आशा आहे की 28 फेब्रुवारीपासून सर्व रेस्टॉरंट्सना पूर्ण क्षमतेने काम करण्याची परवानगी दिली जाईल," असे TTAG चे अध्यक्ष नीलेश शहा यांनी बुधवारी सांगितले.

आगामी काळात गोव्यात कार्निव्हल आयोजित करण्यात येणार आहे. यामुळे आम्हाला व्यवसायात लक्षणीय सुधारणा होण्याची अपेक्षा आहे, असे शहा पुढे म्हणाले.

ओमिक्रॉनच्या वाढत्या प्रकरणांमुळे गोवा सरकारने 29 डिसेंबर 2021रोजी पर्यटनाशी (Tourism) संबंधित आस्थापनांवर 50% क्षमतेचे निर्बंध लादले होते. मात्र, आता परिस्थिती नियंत्रणात येत असल्याचे चित्र दिसत आहे.