म्हापसा : हळदोणा मतदारसंघातील विविध रस्त्यांवरील वीज खांबांवर मोठ्या प्रमाणात वेलीची झाडी वाढली आहेत. या वेलींमुळे पथदिव्यांचा प्रकाश व्यवस्थित पडत नाही. याशिवाय या झुडपांमुळे लोकांना धोका निर्माण झाला असून, ती तातडीने कापण्यात यावीत, अशी मागणी होत आहे.

वीज खात्याकडून दरवर्षी मॉन्सूनपूर्व देखभाल दुरुस्तीची कामे वीजपुरवठा खंडित करून हाती घेतली जातात. यावेळी धोकादायक स्थितीत वीजवाहिन्यांवरील वाढलेल्या झाडाझुडपांसह वेली कापल्या जातात. मात्र यावर्षी वीजपुरवठा खंडित करूनही हळदोणा मतदारसंघातील अनेक भागांत ही कामे व्यवस्थित केलेली नाहीत, असेच चित्र दिसते. हळदोणा मतदारसंघातील गाळवार येथील वीज खात्याच्या उपकेंद्रापासून हाकेच्या अंतरावरही असे प्रकार घडल्याची माहिती काही लोकांनी दिली. पोंबुर्फा, ओळावली भागात, खोर्जुवे, किटला-हळदोणा तसेच इतर अनेक भागांत वीज पोलांवर वाढलेली ही झुडपे कापण्यात यावीत, अशी मागणी केली जात आहे.

संबंधितांनी कामे वेळेत पूर्ण करण्याची आवश्‍यकता

हळदोणातील स्थानिक अमरनाथ पणजीकर यांनी खात्याच्या अभियंत्यांनी धोकादायक अवस्थेतील ही झुडपे कापावीत, अशी मागणी केली. पावसाळ्यात या झाडाझुडपांमुळे वीजपुरवठा खंडित होण्याचे प्रकार घडण्याची शक्यता असते. सरकारने याकडे लक्ष द्यावे, अशी मागणी त्यांनी केली. पोंबुर्फा येथील मिथुन म्हांबरे यांनी ओळावली परिसरात वाढलेली ही झुडपे कापण्याची मागणी केली. त्याचप्रमाणे अशा नियमित कामांकडे संबंधित खात्याने आपणहून लक्ष देत ही कामे वेळेत पूर्ण करण्याची आवश्यकता असते, असेही ते म्हणाले.