Poinguinim Marliwada Bus Service

काणकोण: पैंगीण पंचायत क्षेत्रातील खोतीगाव अभयारण्य कक्षात येणाऱ्या दुर्गम अशा मार्लीवाड्यापासून बससेवा सुरू करण्यात आली आहे.

मार्ली वाड्यापासून सुमारे चार किलोमीटर अंतरावर असलेल्या तिर्वाळपासून कदंब बसच्या सकाळ व संध्याकाळ अशा दोन फेऱ्या होतात. मात्र, मार्ली येथील सुमारे सहाशे लोकसंख्या असलेल्या रहिवाशांना चालत तिर्वाळ येथे येऊन बस पकडावी लागते होती. त्याचा सर्वाधिक त्रास शाळकरी मुलांना होत होता. मार्ली ते तिर्वाळ हा भाग निर्जन असून काहीवेळा शाळकरी मुलांना चालत येताना वन्य श्वापदांना सामोरे जावे लागत होते.

यापूर्वी रस्ता व अन्य मूलभूत सोयीच्या मागणीसाठी येथील मतदारांनी लोकसभा निवडणुकीवर बहिष्कार टाकला होता. आता सभापती डॉ. रमेश तवडकर व पैंगीणच्या सरपंच सविता तवडकर यांच्या प्रयत्नामुळे कदंब महामंडळाच्या ‘माझी बस’ या योजनेतून ही बससेवा सुरू करण्यात आली आहे. सकाळी ७ वाजता मार्ली गावातून तिर्वाळ - दाबेल - आमोणे - शिशेव्हाळमार्गे काणकोण या मार्गावरून ही माझी बससेवा सुरू करण्यात आली आहे. त्याचबरोबर संध्याकाळी ५.५५ वाजता पुन्हा काणकोण बसस्थानकावरून ही बस त्याच मार्गे मार्ली वाड्यावर जाणार आहे.