दाबोळी: रक्षाबंधन हा बहीण-भावाच्या पवित्र व अतूट प्रेमाचा सण. अशा आनंदमय सणासाठी बहिणीने प्रेमाच्या ओलाव्याने पोस्टाद्वारे पाठविलेली राखी थेट भावाच्या अंत्ययात्रेवेळीच पोचली. मनगटावर राखी बांधण्याऐवजी दोन बहिणींना साश्रू नयनांनी भावाला अखेरचा निरोप द्यावा लागल्याने त्यांच्या दु:खाला पारावार राहिला नव्हता.

ही हृदय पिळवटून टाकणारी घटना घडली सडा-वास्को येथे. ‘एमपीए’च्या कार्यालयात काम करणाऱ्या ४४ वर्षीय विवाहित तरुणाला एकूण तीन बहिणी. त्यापैकी एक विदेशात आहे. पैकी पेडणे तालुक्यातील केरी येथील बहिणीने राखी पौर्णिमेनिमित्त काही दिवसांपूर्वी त्याला स्पीड पोस्टद्वारे राखी पाठविली होती.

मात्र, दुर्दैवाने हृदयविकारामुळे या तरुणाचे बुधवारी रात्री १२ वाजता निधन झाले. त्यामुळे (गुरुवारी) सकाळी त्याच्या गोव्यातील दोन्ही बहिणींना नातेवाईकांनी सडा -वास्को येथे बोलावून घेतले. भावाच्या निधनामुळे शोकाकुल वातावरण असतानाच अंत्ययात्रेवेळी बहिणीने पाठविलेली राखी पोस्टमन तेथे घेऊन आल्याने बहिणींच्या अश्रूंचा बांध फुटला. यावेळी उपस्थित नातेवाईकांनी राखी न स्वीकारता ती परत पाठवली.