Ponda Marriage Bride Escape Incident

फोंडा: ‘तन्‍नू वेड्स मनू’, ‘जब वुई मेट’, ‘थ्री इडिएट्स’ या गाजलेल्‍या चित्रपटांतील कथानकांप्रमाणेच एक प्रसंग नुकताच गोव्‍यातही घडला. दोन दिवसांपूर्वी फोंड्यात एक लग्न समारंभ आयोजित केला होता. लग्नघटिका जवळ आली होती; पण ऐनवेळी नवरी मुलगी वधूवेषातच प्रियकरासोबत पळून गेली. बिचाऱ्या नवरदेवाला आपल्या कुटुंबासह मान खाली घालून लग्न मंडपातून घरी परतावे लागले, तेही वधूच्या आततायी निर्णयामुळे!

काही दिवसांपूर्वी मुला-मुलीने एकमेकांना पाहिले आणि पसंतही केले. रिवाजानुसार पै-पाहुणांच्या उपस्थितीत साखरपुडाही झाला. सगळं काही बरं चाललं होतं! अखेर लग्न ठरलं लग्नाचा दिवसही उजाडला. दोन्ही बाजूची वऱ्हाडी मंडळी नियोजित मंडपात पोचली. नवरा मुलगा हातात हार घेऊन तयार.

एका छान सजलेल्या कारमधून नवरी मंडपाच्या दारात उतरली. त्याचवेळी सर्वांना धक्का देणारी घटना घडली. दुसरी एक कार नवरीच्या कारपुढे अचानक उभी राहिली अन् डोळ्यांचे पाते लवते न लवते, तोच वधूवेशातील नवरी मुलगी त्या दुसऱ्या कारमध्ये बसली आणि प्रियकरासोबत पळून गेली.

हजारभर लोकांच्या जेवणाची सोय; पण...

या लग्न सोहळ्यानिमित्त हजारभर लोकांच्या जेवणाची सोय करण्यात आली होती; पण तेथे अनपेक्षितपणे जो प्रकार घडला, तो पाहून कुठलं जेवण आणि कुठलं काय? नवरीकडील मंडळीकडून यावर काहीच उत्तर आले नाही. बिच्चारा नवरदेव हताश होऊन बसला होता. नवरा मुलगा आणि त्याच्या कुटुंबीयांना बराच मन:स्ताप सहन करावा लागला, तोही वधूच्या एका विश्‍वासघातकी निर्णयामुळे.

बाका प्रसंग टळला असता

लग्न ठरविण्यापूर्वीच संबंधित मुलीने जर आपले दुसऱ्यावर प्रेम आहे हे घरच्यांना सांगितले असते, तर तिच्या आणि नवरदेवाच्याही कुटुंबीयांची नाचक्की नक्कीच टळली असती, अशी चर्चा लग्नस्थळी सुरू होती.