BPS Club Election 2023: मडगावमधील अत्‍यंत जुन्या व प्रतिष्ठेच्या बीपीएस क्लबची निवडणूक आज रंगतदार वातावरणात झाली.

या निवडणुकीत मडगावचे आमदार दिगंबर कामत यांचे सुपुत्र योगिराज कामत आणि आब्रेऊ ऑस्कर वॉलफॅंगो यांच्या दोन पॅनलमध्ये जबरदस्त चुरस होती. मात्र, कामत गटाचे सर्व उमेदवार मोठ्या मताधिक्याने निवडून आले.

आपले पॅनल जिंकेल याची खात्री होती, असे योगिराज यांनी सांगितले. राजकीय मनीषा बाळगून मार्गक्रमण करणाऱ्या कामत यांच्‍यासाठी ही पहिली परीक्षा मानली जात होती.

नवीन क्लब हाऊस, क्लबची दुरुस्ती, नूतनीकरण व अधिक सुविधा उपलब्ध करून देण्यासाठी प्रयत्न करणार असल्याचे योगिराज म्हणाले. या निवडणुकीसाठी बीपीएस क्लबचे १,१२५ सभासद पात्र होते.

त्यातील ५९९ सभासदांनी मतदानात भाग घेतला. नऊ जागांसाठी एकूण २१ उमेदवार रिंगणात होते.

त्यातील कामत गटाचे ज्युस्त कॉस्ता यांची अध्यक्षपदी बिनविरोध निवड पूर्वीच करण्यात आली होती. उपाध्यक्षपदी इयान कार्ल आरावजो आल्वारीस यांची निवड झाली.

कामत गटाचे निवडून आलेले उमेदवार -

दा कॉस्ता फ्रॅंन्स्की (४३५) दोरादो वोलुसियानो (४०७), संतोष जॉर्ज (४८३), योगिराज कामत (४७२), मांगिरीश कुंदे (४७९), चिराग नायक (४६९), सुनीत पिंटो (४५९), शशांक शिरवईकर (४०३), विक्रम वेर्लेकर (४९५).

नेते राजकीय, पण राजकारण नाही!

या निवडणुकीत आमदार कामत यांचे सुपुत्र योगिराज यांचे पॅनल असल्याने निवडणुकीला बरेच महत्त्व प्राप्त झाले होते. फातोर्ड्याचे आमदार विजय सरदेसाई, हळदोण्याचे आमदार कार्लुस फेरेरा तसेच इतर राजकीय नेत्यांनी भाग घेतला होता.

मात्र, सर्वांनीच या निवडणुकीत राजकारण नसल्याचे सांगितले. मला जे उमेदवार योग्य वाटले, त्यांना मतदान केले. मतदान करताना मी पॅनल पाहिले नाही, असे आमदार फेरेरा म्हणाले.

हा मडगावातील प्रतिष्ठित क्लब असून त्याचे हजारो सभासद आहेत. मी नगरनियोजन मंत्री असताना मडगावमधील एमसीसी, क्लब हार्मोनिया, बीपीएस क्लबला २०० एफएआर मिळवून दिला होता. त्यामुळे क्लबला या जागेचा खूप फायदा झाला.

- विजय सरदेसाई, आमदार, फातोर्डा.