पणजी: ‘कोविड - 19’चा संसर्ग पुन्हा राज्यात वाढत आहे. लसीकरणामुळे कोरोनाची लागण होऊनसुद्धा अधिकच्या उपचारासाठी रुग्णालयात दाखल करण्याची वेळ खूप अत्यल्प रुग्णांवर येत असतानाच रविवारी कोरोनामुळे दोघांचा मृत्यू झाल्याची माहिती आरोग्य प्रशासनाने दिली .

(Both died of corona without taking booster dose in goa)

कोरोनामुळे आज गोवा वैद्यकीय महाविद्यालयाच्या रुग्णालयामध्ये दोघांचा मृत्यू झाला. यातील 75 वर्षीय रुग्ण मधुमेह, किडनी आणि इतर आजारांनी त्रस्त होते. तर 70 वर्षीय पुरुष रुग्ण लठ्ठपणा आणि इतर रोगांनी आजारी होते. गंभीर बाब म्हणजे या दोघांनीही कोरोनाचा बूस्टर डोस घेतलेला नव्हता. दरम्यान, आज 950 संशयितांच्या चाचण्या केल्या असता नव्याने 112 रुग्णांना कोरोनाची बाधा झाल्याचे स्पष्ट झाले आहे.

आतापर्यंत 3,835 रुग्ण कोरोनामुळे दगावले आहेत. यात आज दोन रुग्णांची भर पडली आहे. सध्या राज्यात 928 सक्रीय रुग्ण आहेत.

राज्यात लसीकरणाचे प्रमाण मोठे असले तरी अद्यापही बुस्टर न घेणाऱ्यांचे प्रमाण मोठे आहे. 60 वर्षांवरील आणि अन्य आजारांनी त्रस्त असलेले नागरिक बुस्टर डोस घेण्यासाठी पात्र आहेत. त्यांनी तातडीने बुस्टर डोस घेणे गरजेचे आहे. सध्यातरी कोरोनासाठी लसीकरणाला पर्याय नाही.

- डॉ. उत्कर्ष बेतोडकर, कृतिदलाचे सदस्य.