सासष्टी: सार्वजनिक बांधकाम खात्याने बोरी पुलाच्या दुरुस्तीचे काम टप्प्याटप्प्याने सुरू केले आहे. या पुलाची दुरुस्ती आवश्यक होती. पण लोकांची सोय करून ती करायला हवी होती, असे लोकांचे म्हणणे आहे. बोरी पूल बंद झाल्याने राशोल-शिरोडा फेरी वरील ताण वाढला आहे त्यामुळे वाहतुकीची कोंडीचा सामना करावा लागत असल्याचे नागरिकांनी सांगितले.

बोरी पुलाची दुरुस्ती शनिवारपासून (ता.११) सुरू झाली. शनिवार व रविवार रात्री ८ ते सकाळी ८ पर्यंत हा पूल वाहतुकीस बंद करण्यात आला. त्यामुळे लोक रात्रीच्या वेळी म्हार्दोळ, कवळे, मंगेशी मधील मंदिरात पालखी किंवा इतर उत्सवासाठी गेले होते त्यांना रात्रीच्या वेळी येताना शिरोडा, सावर्डे, केपे मार्गे यावे लागले. काहींनी जुने गोवे, आगशी व जुवारी पुलावरुन यावे लागले. रविवारी सकाळी फोंडाहून भाजी, फळे किंवा इतर विक्री सामान घेउन पहाटे मडगावला येत होते त्यांना सुद्धा त्रास झाला.

पोलिसांची गरज

राशोल-शिरोडा फेरीवर ताण वाढला आहे. या फेरी मार्गावर केवळ दोनच फेरीबोटी आहेत. त्यामुळे लोकांना नदी पार करण्यासाठी अर्धा -पाऊण तास वाट पहावी लागत आहे. तसेच अरुंद रस्त्यावर वाहतूक कोंडी होताना दिसत आहे. शिवाय फेरीबोटीचे वेळापत्रक सुद्धा निश्र्चित नाही. त्यातच वाहतूक सुरळीत करण्यासाठी पोलिस तैनात केलेले नाहीत.

यासंदर्भात, पिटर वाझ यांनी सांगितले की, या मार्गावर त्या वेळेत जास्त फेरीबोटीची व्यवस्था करायला हवी होती. शिवाय धक्क्यावर व धक्क्याच्या जरा पुढे पोलिस ठेवायला हवे होते, ही सर्व व्यवस्था करुनच पुलाच्या दुरुस्तीचे काम हातात घ्यायला हवे होते.

बोरी पूल खालील दिवशी असेल बंद

१८ व १९ ऑक्टोबर - रात्री १० ते सकाळी ६

२५ व २६ ऑक्टोबर - रात्री ८ ते सकाळी ८

१ व २ नोव्हेंबर- रात्री १० ते सकाळी ६