Borim Accident 6 Injured: दक्षिण गोव्यातील बोरी येथे शनिवारी (6 सप्टेंबर) सायंकाळी एका भीषण अपघातात काँक्रिटवाहू ट्रकने एका कारला जोरदार धडक दिली. सायंकाळी 4:10 वाजता घडलेल्या या घटनेत कारमधील सहा प्रवासी जखमी झाले असून त्यापैकी तिघांची प्रकृती गंभीर आहे. जखमींमध्ये चार मुलांचा समावेश असून सर्वजण मूळचे तेलंगणाचे पण सध्या वर्का, मडगाव येथे राहत आहेत. या घटनेमुळे फोंडा-मडगाव मार्गावरील वाहतूक काही काळ विस्कळीत झाली.

पोलिसांनी दिलेल्या माहितीनुसार, एमएच-07 एन 1360 (MH-07 N 1360) क्रमांकाचा काँक्रिट मिक्सर ट्रक फोंडा बाजूकडून येत होता, तर टीएस-07 जीटी 5672 (TS-07 GT 5672) क्रमांकाची कार समोरुन येत होती. बोरी येथील एका वळणावर ट्रक चालकाचे नियंत्रण सुटले आणि भरधाव वेगाने आलेल्या ट्रकने थेट कारला धडक दिली. धडक इतकी जोरदार होती की, कारचा पुढील भाग पूर्णपणे चेपला गेला आणि त्यात बसलेले सर्व प्रवासी अडकले. कारचे मोठे नुकसान झाले.

जखमी प्रवाशांची माहिती

अपघाताची माहिती मिळताच स्थानिकांनी आणि वाहतूक पोलिसांनी तात्काळ घटनास्थळी धाव घेतली. स्थानिकांच्या मदतीने कारमधून जखमींना बाहेर काढण्याचे प्रयत्न सुरु झाले. या अपघातात एकूण सहा जण जखमी झाले, ज्यात कार चालक रघुराम (वय 45) आणि पाच मुलांचा समावेश आहे. जखमींना तातडीने जवळच्या रुग्णालयात दाखल करण्यात आले. त्यांची नावे खालीलप्रमाणे:

1. रघुराम, वय 45, वर्का, मडगाव (मूळ तेलंगणा) - कार चालक

2. हैमा संविता, वय 12, वर्का, मडगाव (मूळ तेलंगणा)

3. माया अक्षय देशपांडे, वय 39, वर्का, मडगाव (मूळ तेलंगणा)

4. साई कृष्णा, वय 11, वर्का, मडगाव (मूळ तेलंगणा)

5. अभिमा देशपांडे, वय 13, वर्का, मडगाव (मूळ तेलंगणा)

6. सात्विक रेड्डी, वय 12, वर्का, मडगाव (मूळ तेलंगणा)

जखमींपैकी हैमा संविता, माया अक्षय देशपांडे आणि साई कृष्णा यांची प्रकृती गंभीर असल्यामुळे त्यांना अधिक उपचारासाठी गोवा वैद्यकीय महाविद्यालयात दाखल करण्यात आले आहे. इतर जखमींवर प्राथमिक उपचार करुन त्यांना डिस्चार्ज देण्यात आला आहे.

पोलिसांची कारवाई आणि वाहतुकीवर परिणाम

अपघातामुळे फोंडा-मडगाव महामार्गावर मोठी वाहतूक कोंडी झाली. फोंडा वाहतूक पोलिसांनी तात्काळ घटनास्थळी येऊन वाहतूक सुरळीत करण्यासाठी प्रयत्न केले. पोलिसांनी अपघाताचा पंचनामा केला असून ट्रक चालकाला ताब्यात घेण्यात आले आहे. चालकाविरुद्ध बेदरकारपणे वाहन चालवल्याचा गुन्हा दाखल करण्यात आला आहे.

गेल्या काही दिवसांपासून गोव्यात रस्ते अपघातांचे प्रमाण वाढले आहे. विशेषतः अवजड वाहनांमुळे होणाऱ्या अपघातांमुळे अनेकांना जीव गमवावा लागला आहे किंवा गंभीर दुखापती झाल्या आहेत. बोरी येथील हा रस्ता अवजड वाहनांच्या वर्दळीमुळे आणि काही धोकादायक वळणांमुळे अपघात प्रवण क्षेत्र म्हणून ओळखला जातो. प्रशासनाने या भागात वाहतुकीच्या नियमांचे काटेकोर पालन करावे आणि अवजड वाहनांच्या वेगावर नियंत्रण ठेवावे, अशी मागणी स्थानिकांनी पुन्हा एकदा केली आहे. या घटनेमुळे पुन्हा एकदा महामार्गावरील सुरक्षेचा प्रश्न ऐरणीवर आला आहे. पोलिसांकडून पुढील तपास सुरु आहे.