डिचोली: 'डेल्टा प्लस' विषाणूच्या पार्श्वभूमीवर रॅपिड अँटीजन चाचणीसह डिचोली तालुक्याला जोडणाऱ्या दोडामार्ग सीमा तपासणी नाक्यावर कडक 'नाकाबंदी' करण्यात आली आहे. कालपासून या सीमा नाक्यावर प्रयोगशाळा स्थापन करून रॅपिड अँटीजन चाचणी करण्याची मोहीम सुरु झाली असून, शनिवारी (ता. 26) दोडामार्ग येथे सतरा प्रवाशांची 'कोविड' चाचणी करण्यात आल्याची माहिती मिळाली आहे. दरम्यान, डिचोलीचे मामलेदार प्रवीणजय पंडित हे दोडामार्ग तपासणी नाक्यावरील व्यवस्था आणि परिस्थितीवर नजर ठेवून आहेत. मुख्यमंत्री डॉ. प्रमोद सावंत यांनीही तशी सूचना मामलेदारांना केली आहे.

17 जणांची चाचणी नकारात्मक

शनिवारी दिवसभरात दोडामार्ग सीमा तपासणी नाक्यावर सीमेबाहेरून आलेल्या 17 जणांची रॅपिड अँटीजन चाचणी करण्यात आली. या 17 ही जणांचे अहवाल नकारात्मक आले आहेत. अशी माहिती मामलेदार श्री. पंडित यांच्याकडून मिळाली आहे. चाचणीच्या शुल्कापोटी 4 हजार 400 रूपये जमा करण्यात आले आहे. सीमेबाहेरून येणाऱ्या ज्या प्रवाशांजवळ 'कोविड' निगेटिव्ह प्रमाणपत्र नाही त्यांना रॅपिड अँटीजन चाचणी सक्तीची करण्यात आली आहे.