डिचोली: बोर्डे येथील शिगमोत्सवाला उत्साहात प्रारंभ झाला असून बुधवारी (ता. ४) प्रसिद्ध होमकुंड उत्सव साजरा करण्यात येणार आहे. श्री वडेश्वर देवाच्या प्रांगणात हा उत्सव पारंपरिक पद्धतीने साजरा होणार आहे.

बुधवारी रात्री मोडासह श्रींचा कलश मंदिराबाहेर काढण्यात आल्यानंतर होमकुंड पेटविण्यात येणार आहे. नंतर वाजतगाजत देवीच्या कलश मिरवणुकीसह व्रतस्थ भक्तगण गावतड येथील पवित्र झरीवर जाऊन त्याठिकाणी स्नान करून पुनःश्च वाजतगाजत होमकुंडस्थळी येणार आहेत. माघारी येताना श्री सातेरी, श्री महामाया, श्री रवळनाथ, श्री ब्राह्मण, श्री वडेश्वर आदी देवतांचा भोवमान करण्यात येणार आहे.

होमकुंड स्थळी आल्यानंतर मध्यरात्री पारंपरिक कार्यक्रमांनुसार श्रींच्या कलशासहित व्रतस्थ भक्तगण "पुंडलिक वरदे हरी विठ्ठल" आदी देवदेवतांचा जयघोष करीत रखरखत्या होमकुंडातून अग्निदिव्य करणार आहेत. तत्पूर्वी रात्री १०.३० वा. झरेबांबर-दोडामार्ग येथील नाईक दशावतारी पारंपरिक दशावतार नाट्यमंडळातर्फे ''पाप प्रकोप'' हा नाट्यप्रयोगही होणार आहे. भाविकांनी या उत्सवात सहभागी व्हावे असे आवाहन केले आहे.

गुरुवारी घोडेमोडणी

बोर्डे येथील शिगमोत्सवाचे आकर्षण असलेली प्रसिद्ध घोडेमोडणी गुरुवारी (ता. ५) साजरी करण्यात येणार आहे. सायंकाळी गावतड येथे घोडेस्वारांना सजविण्यात येणार आहेत.

कोराटीच्या मैदानावर घोडेस्वार आल्यानंतर पारंपरिक पद्धतीने घोडेमोडणी साजरी करण्यात येणार आहे. बोर्डे येथील गडे उत्सव रविवारी पारंपरिक पद्धतीने साजरा करण्यात आला. या उत्सवाला भाविकांनी गर्दी केली होती.