Goa School : मुरगावातील एका शाळा व्यवस्थापनाकडे ‘माध्यमिक’ची पुस्तके आली नाहीत का, अशी विचारणा करण्यास गेलेल्या पालकांना संबंधित पुस्तके बाहेरून विकत घेण्याचा सल्ला देण्‍यात आला. त्‍यामुळे आश्‍‍चर्य व्‍यक्‍त करण्‍यात येत असून पाचवी ते आठवीपर्यंतची पुस्तके मोफत दिली जात असल्याने खुल्या बाजारात ती उपलब्ध होत नाहीत, हे शाळा व्यवस्थापनाला माहीत नाही का? असा सवाल उपस्थित होत आहे.

यंदा शालेय विद्यार्थ्यांना वेळेत पुस्‍तके उपलब्‍ध झाली नाहीत. म्‍हणून काही शाळांनी अगोदरच्या इयत्तेतील विद्यार्थ्यांकडून पुस्तके घेऊन नव्याने आलेल्या विद्यार्थ्यांना ती दिली असल्याचीही माहिती पुढे आली आहे.

कोल्हापूरच्या प्रिंटरकडे पाचवी ते आठवीची पुस्तके छपाईसाठी देण्‍यात आली आहेत. तेथे कागदाच्‍या कमतरतेमुळे पुस्‍तक छपाईस विलंब झाला आहे. शिक्षण खात्‍याकडून 30 मेपर्यंत सर्व पुस्तकांची मागणी करण्‍यात आली, परंतु संबंधित कंत्राटदाराने 10 जूनपर्यंत वाढीव मुदत मागितली.

तथापि, दररोज दोन ट्रक पुस्तके गोव्यात येत आहेत. या आठवड्यात सर्व पुस्तकांचे वाटप पूर्ण होईल, अशी माहिती शिक्षण संचालक शैलेश झिंगडे यांनी ‘गोमन्तक''शी बोलताना दिली. पाचवी ते आठवीच्या विद्यार्थ्यांच्या पुस्तकांचे ७० टक्के वितरण झालेले आहे. उर्वरित ३० टक्के बाकी आहे, असेही ते म्‍हणाले.

चौकशी होणार

मुरगावात एका ठिकाणी क्रमिक अभ्‍यासक्रमाची पुस्‍तके बाहेरून विकत घेण्याचा पालकांना सल्ला देण्‍यात आला असल्‍याचे प्रकरण आमच्‍यापर्यंत पोहोचले आहे. यासंदर्भात चौकशी करण्‍यात येईल, असे शिक्षण खात्‍याच्‍या अधिकाऱ्यांनी स्‍पष्‍ट केले आहे.

"शालेय पुस्तकांचा विषय या आठवड्यातच निकाली लागेल. विद्यार्थ्यांना अडचण होऊ नये, यासाठी पुस्‍तकांच्‍या सॉफ्‍ट कॉपी दीक्षा पोर्टलवर अपलोड केल्‍या आहेत."

- शैलेश झिंगडे, शिक्षण संचालक