मडगाव: नावेली येथील संशयित सेफ्टीन रझा कोसंबी याने एका अल्पवयीन मुलीवर लैंगिक अत्याचार केल्याप्रकरणी पॉक्सो विशेष न्यायालयाने ठोठावलेली १० वर्षांची सक्तमजुरी आणि ५० हजार रुपयांचा दंडाची शिक्षा मुंबई उच्च न्यायालयाच्या गोवा खंडपीठाने कायम ठेवली आहे.

सप्टेंबर २०१७ मध्ये ‘मैत्रिणीकडे जाते’ असे सांगून घरातून बाहेर पडलेली १७ वर्षांची पीडित मुलगी अचानक बेपत्ता झाली होती. याबाबत पोलिसांत तक्रार नोंदविण्यात आल्यानंतर तपासादरम्यान ती संशयित कोसंबी याच्यासोबत असल्याचे उघड झाले. संशयिताने तिला फसवून गोव्याबाहेर नेले होते. काही दिवसांनी पोलिसांनी दोघांना मडगाव येथील एका हॉटेलमधून ताब्यात घेतले. या प्रकरणी पॉक्सो विशेष न्यायालयाने आरोपीला दोषी ठरवत १० वर्षांची सक्तमजुरी आणि ५० हजार रुपयांचा दंड ठोठावला होता. या निर्णयाला आरोपीने उच्च न्यायालयात आव्हान दिले होते.

निकालात काय?

न्यायालयाने आपल्या निकालात नमूद केले की, घटनेच्या वेळी पीडित मुलगी १७ वर्षे ४ महिने वयाची होती, म्हणजेच ती कायद्यानुसार ‘बाल’ या संज्ञेत मोडते. पॉक्सो कायद्यानुसार अल्पवयीन मुलीची संमती ग्राह्य धरली जात नाही आणि अशा प्रकारचा संबंध हा लैंगिक अत्याचारच मानला जातो. पीडितेच्या वैद्यकीय तपासणी व फॉरेन्सिक अहवालातून अत्याचाराचे पुरावे स्पष्ट झाले आहेत. त्यामुळे विशेष न्यायालयाने ११ एप्रिल २०२५ रोजी दिलेला निकाल योग्य असल्याचे खंडपीठाने स्पष्ट केले.