Bodybuilding Competition : तब्बल पंधरा वर्षांच्या कालखंडानंतर डिचोलीत यंदा पुरुषांसाठी शरीरसौष्ठव स्पर्धा आयोजित करण्यात आली आहे. शनिवारी (ता.25) सायंकाळी 6 वा. येथील छत्रपती शिवाजी महाराज मैदानावर ही स्पर्धा होणार आहे. स्पर्धेत चॅम्पियन ठरणाऱ्या विजेत्याला रोख 20 हजार रुपयांसह ‘मिस्टर बिचोलीम’ हा किताब बहाल करण्यात येणार आहे.

पी. पी. धोंड गो मस्कलर जीम अँड फिटनेस सेंटर आणि आर फिटनेस स्टुडिओ यांच्या संयुक्त विद्यमाने ही स्पर्धा होणार आहे. स्पर्धेच्या उद्‌घाटन सोहळ्यास आमदार डॉ. चंद्रकांत शेट्ये प्रमुख पाहुणे तर नगराध्यक्ष कुंदन फळारी आणि फोगेरी केटरर्सचे कुंदन फोगेरी खास अतिथी म्हणून उपस्थित राहणार आहेत.

गुरुवारी सायंकाळी नगरपालिका सभागृहात स्पर्धेतील चषकांचे अनावरण केल्यानंतर आयोजित पत्रकार परिषदेत पी. पी. धोंड गो मस्कलर जीम अँड फिटनेस सेंटरचे प्रसाद धोंड यांनी ही माहिती दिली. यावेळी आर फिटनेस स्टुडिओचे हसन शेख, आयोजन समितीचे विष्णू उसकईकर, प्रथम आमोणकर, अरुण नाईक आदी पदाधिकारी उपस्थित होते.

राज्य पातळीवरील स्पर्धेतील प्रथम पाच विजेत्यांना चषक आणि रोख बक्षिसे देण्यात येणार आहेत. राज्य पातळीवरील स्पर्धेसह डिचोली आणि मये भागातील युवा शरीरसौष्ठवपटू आणि फिटनेस ॲथिलीटना पुढे येण्यासाठी वेगळ्या गटातून स्पर्धा घेण्यात येणार आहे, अशी माहिती विष्णू उसकईकर यांनी दिली. जास्तीत जास्त लोकांनी स्पर्धेचा आस्वाद घेऊन स्पर्धा यशस्वी करावी, असे आवाहन आयोजकांनी केले आहे.