पणजी : गोव्यात विधानसभा निवडणुकीत भाजपने विजय मिळवल्यानंतर आपला मोर्चा आता लोकसभा निवडणुकांकडे वळवल्याचं चित्र आहे. 2024 च्या लोकसभा निवडणुकीत गोव्यातील दोन्ही जागा भाजपच जिंकणार असा विश्वास गोवा भाजप प्रदेशाध्यक्ष सदानंद शेट तानावडेंनी केला आहे. तसंच आगामी पंचायत निवडणुकीत भाजपलाच लोक पसंती देतील असंही तानावडे म्हणाले आहेत.

गोव्यात विधानसभा निकालाला आठवडाभर उलटूनही अजूनही सत्तास्थापनेचा दावा करण्यात आलेला नाही. मात्र ही स्थिती फक्त गोव्यातच नाही तर भाजप जिंकलेल्या चारही राज्यात असल्याचं सदानंद शेट तानावडेंनी (Sadanand Shet Tanavade) स्पष्ट केलं. तसंच होळीपर्यंत सरकार स्थापन होणार नसल्याचीही त्यांनी सांगितलं. 21 किंवा 22 मार्चला केंद्रीय निरीक्षक गोव्यात दाखल होतील आणि सत्तास्थापनेच्या दाव्याबद्दल निर्णय घेतील असं तानावडे म्हणाले. मात्र मगोपला सोबत घेणार की नाही यावर त्यांनी सूचक मौन बाळगल्याचं चित्र आहे.

गोव्यात भाजपमध्ये (BJP) कोणतेही मतभेद नाहीत. मात्र मुख्यमंत्रीपदाचं नाव केंद्रीय निरीक्षकच जाहीर करतील, असं तानावडेंनी सांगितलं आहे. गेल्या काही दिवसांपासून प्रमोद सावंत आणि विश्वजीत राणेंमध्ये (Vishwajit Rane) मुख्यमंत्री पदावरुन वातावरण तापल्याची चर्चा होती. मात्र भाजप प्रदेशाध्यक्ष सदानंद शेट तानावडेंनी या गोष्टीचा साफ शब्दात इन्कार केला आहे. दरम्यान विश्वजीत राणेंना मुख्यमंत्रीपदाबाबत विचारलं असता त्यांनी पत्रकारांवरच आगपाखड केल्याचं उघड झालं आहे. त्यामुळे मुख्यमंत्रीपदावरुन कुठेतरी भाजपच्या गोटात नाराजी असल्याचं चित्र दिसत आहे.