म्हापसा: केंद्र सरकारने जीएसटीच्या कर प्रणालीमध्ये कपात केल्याने, सध्या भाजपाकडून सर्वत्र जीएसटी उत्सव साजरा करून लोकांमध्ये जागृती केली जात आहे.

या कार्यक्रमाच्या अनुषंगाने, शुक्रवारी (ता. २६) सायंकाळी पिर्ण - बार्देश येथे मंत्री नीळकंठ हळर्णकर हे भाजपा कार्यकर्त्यांसोबत गावात जागृती करतेवेळी, आरजीपी कार्यकर्त्यांनी मंत्र्यांना लक्ष्य करून प्रश्न विचारण्याचे प्रयत्न केले.

यावेळी भाजपा व आरजीपी कार्यकर्ते आमने-सामने आल्याने येथील वातावरण बरेच तंग राहिले. दोन्ही गटांमध्ये शाब्दिक बाचाबाची व घोषणाबाजीचा राजकीय कलगितुरा रंगला.

कोलवाळ पोलिसांनी हस्तक्षेप करून दोन्ही गट आमने-सामने येऊ नये व कायदा व सुव्यवस्थेचा प्रश्न निर्माण होऊ नये याची खबरदारी घेतली. यावेळी पोलिस व मनोज परब यांच्यातही शाब्दिक बाचाबाची झाली.

भाजपा व आरजीपी कार्यकर्ते एकमेकांना पाहून मोठमोठ्याने घोषणाबाजी व हातवारे करू लागले. भाजपावाल्यांकडून ‘भारत माता की जय’, ‘नीळकंठ हळर्णकर तुम आगे बडो, हम तुम्हारे साथ है’ अशी घोषणाबाजी देवू लागले, तर दुसरीकडे आरजीपीवाले ‘ऊजो ऊजो म्हणून मंत्री व भाजपा कार्यकर्त्यांना हुर्यो घालण्यात आल्या’. त्यामुळे बराचवेळ वातावरण तंग बनले.

कायदा व सुव्यवस्थेचा प्रश्न निर्माण होऊ नये म्हणून कोलवाळ पोलिस निरीक्षक संजीत कांदोळकर हे आपल्या पोलिस फौजफाट्यासह घटनास्थळी हजर होते. यावेळी आरजीपीचे सर्वेसर्वा मनोज परब यांनी अनेकदा रस्त्यावरून चालत जाणाऱ्या नीळकंळ हळर्णकर यांना प्रश्न विचारत त्यांच्या जवळ जाण्याचा प्रयत्न केला. तेव्हा पोलिसांनी त्यांना रोखण्याचा प्रयत्न केला.

‘... मगच जीएसटी उत्सव साजरे करा’

यावेळी मनोज परब यांनी हळर्णकरांना प्रश्न केले की, रस्ता रुंदीकरणाच्या नावाने पिर्णमधील स्थानिकांना तसेच दुकानदारांना नोटीसा आल्या आहेत. त्यांची घरे सुरक्षित राहणार की नाही, हे मंत्र्यांनी आधी सांगावे. नंतर जीएसटी उत्सव साजरे करावे. मंत्री हळर्णकर हे ग्रामसभेला का आले नाहीत? स्थानिकांना गरज असते, तेव्हा ते गावात येत नाहीत, अशी कोपरखळी त्यांनी मंत्र्यांना लगावली.