Mahadayi Water Dispute म्हादईचा सौदा करणाऱ्या गोव्‍यातील भाजप सरकारने केंद्रीय गृहमंत्री अमित शहा यांच्या फर्मागुढीतील जाहीर सभेत आपली भूमिका स्पष्ट करावी आणि गोमंतकीयांना जे खरे आहे तेच सांगावे, असे आव्हान ‘सेव्ह म्हादई-सेव्ह गोवा मुव्हमेंट’चे कार्यकर्ते तथा गोवा फॉरवर्डचे नेते प्रशांत नाईक यांनी फर्मागुढी येथे आयोजित पत्रकार परिषदेत दिले.

यावेळी संघटनेच्‍या कार्यकर्त्या तथा ‘आप’च्‍या नेत्या प्रतिमा कुतिन्हो, तृणमूल काँग्रेसचे जयेश शेटगावकर, पर्यावरणप्रेमी फ्रेडी त्रावासो व शंकर पोळजी उपस्थित होते.

अमित शहा यांनी बेळगावच्या सभेत गोव्याच्या मुख्यमंत्र्यांबरोबर झालेल्या चर्चेत म्हादईचे पाणी कर्नाटकला देण्याचे ठरले असल्याचे सांगितले होते. म्हादई ही गोव्याची जीवनदायिनी आहे आणि म्हादईला कुणीच पळवू शकत नाही.

अशा स्थितीत गोव्याचे मुख्यमंत्री कसा काय सौदा करू शकतात? या प्रकरणी सारवासारव करणारे गोव्याचे मुख्यमंत्री प्रमोद सावंत यांनी म्हादईचा विषय केंद्रीय गृहमंत्र्यांच्या उपस्थितीत उपस्‍थित करून ‘हा सूर्य आणि हा जयद्रथ’ हे स्पष्ट करावे, असे नाईक म्हणाले.

शहांच्‍या सभेला पैसे देऊन गर्दी

प्रतिमा कुतिन्हो म्हणाल्या की, म्हादई कर्नाटकला विकणाऱ्या भाजप सरकारने गोमंतकीयांनी नेमके काय खरे आणि काय खोटे ते सांगावे.

अमित शहा यांच्या सभेला पैसे देऊन महिलांची गर्दी जमवण्याचा प्रयत्न भाजप सरकारने चालविल्‍याचा आरोपही त्‍यांनी केला.

तर, शंकर पोळजी म्हणाले की, म्हादई म्हणजे गोव्याचे सर्वस्व आहे. गोवा म्हणजे नंदनवन. पण गोव्याचा नरक बनवण्याच प्रकार सध्‍या सुरू आहे. दरम्‍यान, जयेश शेटगावकर यांनीही म्हादईसाठी लढा तीव्र करण्याची गरज व्यक्त केली.