पणजी : पणजीत उत्पल पर्रीकरांऐवजी बाबूश मोन्सेरात यांना उमेदवारीचे संकेत मुख्यमंत्री डॉ. प्रमोद सावंत यांनी दिले आहेत. उत्पल पर्रीकर (Utpal Parrikar) हे पणजीतून भाजपच्या उमेदवारीसाठी इच्छुक आहेत. मात्र पुन्हा एकदा उमेदवारीची माळ बाबूश मोन्सेरात यांच्या गळ्यात पडण्याची शक्यता आहे.

उत्पल पर्रीकर हे मनोहर पर्रीकर यांचे मुलगे असून पणजी विधानसभेच्या (Goa Assembly Election) जागेसाठी आग्रही आहेत. नुकतीच त्यांनी उमेदवारीसाठी दिल्लीवारी केल्याचंही समोर आलं होतं. मात्र नुकत्याच झालेल्या एका कार्यक्रमात मुख्यमंत्र्यांनी बाबूश हेच पणजीतून निवडणूक लढवणार असल्याचे संकेत दिले आहेत.

गोवा विधानसभा निवडणुकीच्या पार्श्वभूमीवर भाजपमध्येच (BJP) आधीच नाराजीनाट्य रंगल्याचं चित्र आहे. बाबू आजगावकरांना त्यांचा पेडणे मतदारसंघ सोडून मडगावमध्ये लढण्यास सांगण्यात आलं आहे. मात्र आजगावकरांनी आपण आपल्या पेडणे (Pedne) मतदारसंघातूनच लढणार असल्याचं स्पष्ट केलं आहे. मायकल लोबो यांनीही नुकताच भाजपला घरचा आहेर दिला होता. त्यामुळे उत्पल पर्रीकरांसोबतच अन्य नेत्यांची नाराजी मिटवण्यात भाजपला यश येतं का हे येत्या काळात पाहणं महत्त्वाचं ठरणार आहे. अन्यथा हीच बंडखोरी भाजपसाठी डोकेदुखी ठरण्याची शक्यता आहे.