वास्को: २०२७ मध्ये गोवा विधानसभा निवडणुकीत भाजपला दारूण पराभवाचा सामना करावा लागणार आहे. हे सरकार बहुजनांच्या विरोधात असून सर्व टप्प्यावर मुख्यमंत्री डॉ. प्रमोद सावंत यांचे सरकार सपशेल अपयशी ठरणार असल्याचे विरोधी पक्षनेते युरी आलेमाव यांनी सांगितले.

दाबोळी - वाडे येथील फ्लोरा ग्रॅड सभागृहात गोवा प्रदेश काँग्रेस समिती तर्फे ‘संविधान बचाव अभियान’ मुरगाव तालुक्यात आयोजित कार्यकर्त्यांच्या मेळाव्यात विरोधी पक्षनेते युरी आलेमाव बोलत होते.

यावेळी गोवा काँग्रेस प्रभारी माणिकराव ठाकरे, सह सल्लागार डॉ. अंजली निंबाळकर, गोवा प्रदेश काँग्रेस समितीचे अध्यक्ष अमित पाटकर, दक्षिण गोवा खासदार कॅप्टन.विरियातो फर्नांडिस, दक्षिण गोवा काँग्रेस अध्यक्ष सावियो डिसिल्वा, गोवा काँग्रेस महिला उपाध्यक्ष स्नेहा फोंडेकर, गोवा काँग्रेस इतर मागास वर्गीय समितीचे अध्यक्ष नितिन चोपडेकर, गोवा काँग्रेस अल्पसंख्याक विभागाचे प्रमुख नियाजी शेख, मुरगावचे माजी नगराध्यक्ष नंदादीप राऊत, नगरसेविका प्रिया राऊत, मुरगाव काँग्रेस गटाध्यक्ष साईश आमेरकर,वास्को गटाध्यक्ष सिध्देश कलंगुटकर, दाबोळी गटाध्यक्ष वसंत नाईक, कुठ्ठाळी काँग्रेस गटाध्यक्ष पिटर डिसोझा व इतर पदाधिकारी उपस्थित होते.

माणिकराव ठाकरे, गोवा काँग्रेस प्रभारी

काँग्रेस पक्षाने संविधान बचावासाठी प्रत्येक तालुक्यातील मतदारसंघात अभियान सुरू केले आहे. यात आम्ही जनतेच्या समस्या जाणून घेऊन, त्या येणाऱ्या पावसाळी अधिवेशनात गोवा विधानसभेबरोबर लोकसभेत मांडणार आहोत.