पणजी: माजी मंत्री पांडुरंग मडकईकरांनी गेल्या आठवड्यात गोवा सरकारवर केलेल्या आरोपाने खळबळ निर्माण केली. राज्य सरकारमधील एका मंत्र्यांने १५ ते २० लाख रुपयांची लाच घेतल्याचा आरोप मडकईकरांनी केल्याने भाजप सरकारची गोची झाली. आरोप गंभीर असल्याने या प्रकरणाची एसीबीने देखील दखल घेतली. दरम्यान, मडकईकरांनी केलेले आरोप खोटे असल्याचा दावा भाजपचे राष्ट्रीय सरचिटणीस अरुण सिंग यांनी केला आहे.

अरुण सिंग पणजीत (१३ मार्च) घेतलेल्या पत्रकार परिषदेत बोलत होते. यावेळी प्रदेशाध्यक्ष दामू नाईक, माजी प्रदेशाध्यक्ष आणि राज्यसभा खासदार सदानंद शेट तानावडे उपस्थित होते. गोव्यातील प्रमोद सावंत सरकार अतिशय प्रामाणिकपणे काम करत असल्याचे अरुण सिंग म्हणाले. मडकईकरांनी केलेले भ्रष्टाचाराचे आरोप खोटे असल्याचेही सिंग यावेळी म्हणाले. मडकईकर आरोप का करतायेत? हे देखील सर्वांना माहिती असल्याचे सिंग म्हणाले.

भाजपचे सरचिटणीस (संघटन) बी. एल. संतोष गोव्यात आले असता त्यांनी राज्याचे मुख्यमंत्री, प्रदेशाध्यक्ष यांच्यासह विविध नेते आणि आमदारांच्या भेटीगाठी घेतल्या होत्या. यावेळी पांडुरंग मडकईकरांनी संतोष यांच्याशी भेटीनंतर गोवा सरकारमध्ये काहीच योग्य पद्धतीने सुरु नसल्याचा आरोप केला होता. राज्यात भ्रष्टाचार नव्हे तर लूट सुरु असल्याचा आरोप मडकईकरांनी केला होता. तसेच, एका फाईलसाठी एका मंत्र्याला १५ ते २० लाखांची लाच दिल्याचा आरोप त्यांनी केला होता.

मडकईकरांची पक्षातून हकालपट्टी होणार?

सरकारमधील मंत्र्यांवर आरोप करणाऱ्या पांडुरंग मडकईकरांवर पक्ष कारवाई करणार का? याबाबत प्रश्न विचारण्यात आल्यावर पक्षात याबाबत चर्चा सुरु असल्याची माहिती खासदार सिंग यांनी दिली आहे. पक्षाने कारवाई करण्याचा निर्णय घेतल्यास मडकईकरांची पक्षातून हकालपट्टी होण्याची शक्यता आहे. दरम्यान, २०२७ च्या निवडणुकीसाठी मडकईकर इच्छुक असून, पक्षाने तिकिट नाकारल्यास इतर पक्ष संपर्कात असल्याची माहिती त्यांनी यापूर्वीच दिली आहे.