Shigmo Festival: ह्रदयद्रावक! शिगम्यात ताशा वाजवताना हार्ट अटॅकने एकाचा मृत्यू; केपे तालुक्यात पसरली शोककळा

Goa Man Dies Of Heart Attack During Shigmo Celebration

केपे: गोव्यात सध्या शिगमोत्सवाची धूम पाहायला मिळत आहे. याचदरम्यान केपे तालुक्यातील मोरपिर्ला येथून धक्कादायक घटना समोर आली आहे. एका व्यक्तीचा ह्रदयविकाराच्या झटक्याने मृत्यू झाला.

नेमकं प्रकरण काय?

केपे तालुक्यातील मोरपिर्ला येथे बुधवारी (12 मार्च) संध्याकाळी वेळीपांच्या शिगम्याच्या मांडावर ताशा वाजवत असताना एका व्यक्तीला ह्रदयविकाराचा झटका (Heart Attack) आल्याने तो खाली कोसळला. तेव्हा तात्काळ उपस्थित लोकांनी त्याला रुग्णालयात नेण्याची व्यवस्था केली मात्र त्यादरम्यान त्याचा मृत्यू झाला. श्रीकांत गांवकर (वय, वर्ष 50) असे या ह्रदयविकाराच्या झटक्याने मृत्यू झालेल्या व्यक्तीचे नाव आहे.

गांवकर वीज खात्याचे कर्मचारी होते

पीडित श्रीकांत गांवकर हे वीज खात्याचे कर्मचारी होते. मोरपिर्ला पंचायतीच्या पंचपदीही त्यांनी काम केले आहे. तसेच, त्यांनी एकता युवा संघाचे संयुक्त सचिव म्हणूनही कार्यरत होते. मागील दोन दोन दशकांपासून ते सामाजिक क्षेत्रात कार्यरत होते. मात्र अचानक झालेल्या त्यांच्या मृत्यूने केपे (Quepem) तालुक्यावर शोककळा पसरली आहे.