कळंगुट : कळंगुट कॉंग्रेसचे उमेदवार मायकल लोबो यांनी भाजपसह आप आणि टीएमसीवर गंभीर आरोप केले आहेत. यावेळी बोलताना ते म्हणाले की, आता निवडणुका जवळ आल्या आहेत, भाजपचे अनेक प्रमुख नेते गोव्यात येत आहेत आणि गोव्यात दुहेरी इंजिन सरकारबद्दल वारंवार विधाने करत आहेत, जे गोव्याला पुढे नेतील गोव्याचा विकास करतील अस ठणकावून सांगत आहेत. आणि कॉंग्रेसवर आरोप करत आहेत. यावरून मायकल लोबो यांनी भाजपसह आप आणि टीएमसीचा खरपूस समाचार घेतला आहे.

दिल्लीतून आप आणि बंगालमधून टीएमसी ही दोन इंजिने भाजपने (BJP) आणली आहेत. आणि ती भाजपला पुढे नेण्याचा प्रयत्न करत आहेत. तसेच आप आणि टीएमसी (TMC) गोव्यातील मतांमध्ये फूट पाडण्याचा प्रयत्न करत आहेत. भाजपने त्यांचे नेते विकत घेतले आहेत. या दोन्ही पक्षांनी काँग्रेसची (Congress) मते फोडली आहेत. आणि भाजपला जिंकवण्यासाठी मदत करत आहेत. गोव्यातील लोकांनी याची जाणीव ठेवली पाहिजे.

भाजप सरकार घोटाळ्यांनी भरलेले असल्याचा दावाही त्यांनी केला. “पीडब्ल्यूडी नोकऱ्यांचा घोटाळा बाहेर आला आहे. त्यांनी पळसकर यांना भाजपचे तिकीट का दिले नाही? कारण पैसे कोणी घेतले ते उघड झाले होते. हे दुहेरी इंजिन सरकार गोव्याच्या विकासाबाबत अपयशी ठरले आहे. अस मत मायकल लोबो (Michael Lobo) यांनी व्यक्त केले आहे.