डिचोली: डिचोली तालुक्यातील अडवलपाल येथे गवा रेड्यांचा कळप गावकऱ्यांच्या नजरेस आला. परिणामी येथील लोकांमध्ये भीतीचे वातावरण पसरले आहे. काही दिवसांपूर्वी गावामध्ये सुमारे पंधरा गवा रेडे आले होते.

गावकऱ्यांनी सांगितले की, मागील 2 महिन्यात येथे एखाद दुसरा गवा रेडा नजरेस पडत होता. मात्र, परवा अचानक 15 गवा रेडे भरदिवसा एका रांगेत चालत असलेले दिसले.

गवा रेड्यांचा कळप बघून गावातील लोकांना धडकी भरली. या गवा रेड्यांनी शेतीचे आणि बागायतींचे नुकसान केले नसले तरी त्यांची परत गावात येण्याची शक्यता नाकारता येत नाही. गावातील शेतकऱ्यांनी (Farmers) आणि बागायतदारांनी याबाबत चिंता व्यक्त केली आहे.

गवा रेडा शेतीचे (Farm) मोठ्या प्रमाणात नुकसान करू शकतो. नुकसान झाल्यास त्याची भरपाई कोण करून देणार?, असा प्रश्न शेतकऱ्यांनी उपस्थित केला आहे. गावात गवा रेडे पोहोचल्यामुळे गावकऱ्यांमध्ये चिंता निर्माण झालेली आहे. वन खात्याने याप्रकरणी लक्ष घालावे, अशी विनंती गावकऱ्यांनी केली आहे.