म्हापसा : दारू परवाना मिळवण्यासाठी बनावट आरोग्य ‘ना-हरकत प्रमाणपत्र’ (हेल्थ एनओसी) सादर केल्याच्या आरोपाखाली म्हापसा अतिरिक्त जिल्हा व सत्र न्यायालयाने संशयित गौरव आणि सौरभ लुथरा यांचा अटकपूर्व जामीन अर्ज शुक्रवारी फेटाळून लावला. सध्या लुथरा बंधू कोलवाळ कारागृहात न्यायालयीन कोठडीत आहेत.

लुथरा बंधूंनी त्यांच्या ‘बर्च क्लब’ व्यवसायासाठी अबकारी विभागाकडून दारूचा परवाना मिळवताना कांदोळी प्राथमिक आरोग्य केंद्राचे बनावट प्रमाणपत्र वापरल्याचा आरोप आहे.

हडफडे येथील ‘बर्च बाय रोमियो लेन’ या नाईट क्लबमधील भीषण अग्निकांडानंतर कागदपत्रांची छाननी करताना हा प्रकार उघडकीस आला. याप्रकरणी म्हापसा पोलिसांनी बनावटगिरीचा गुन्हा नोंद केला आहे.

१ एप्रिलपर्यंत निकाल राखून

हडफडे येथील बर्च क्लब अग्निकांड प्रकरणात गौरव आणि सौरभ लुथरा यांच्या जामीन अर्जावरील निर्णय १ एप्रिलपर्यंत राखून ठेवण्यात आला आहे. साकवाडी, हडफडे येथे ६ डिसेंबर २०२५ रोजी रात्री लागलेल्या भीषण आगीत २५ जणांचा मृत्यू झाला, तर सहा जण जखमी झाले होते. या प्रकरणी हणजूण पोलिसांनी १४ संशयितांविरुद्ध आरोपपत्र सादर केले आहे.