ओल्ड गोवा : ओल्ड गोवा परिसरात माड कोसळून एका दुचाकीस्वाराचा मृत्यू झाला आहे. ओल्ड गोवा येथील राष्ट्रीय पुरातत्व सर्वेक्षण कार्यालयाजवळ ही दुर्घटना घडली. शुक्रवारी दुपारी हा अपघात झाल्याची माहिती आहे. अपघातानंतर तरुणाला रुग्णालयात हलवण्यात आलं मात्र उपचारापूर्वीच त्याचा मृत्यू झाला होता. (Accident in Old Goa News Updates)

ओल्ड गोवा (Old Goa) येथे माड पडून मृत्यू झालेल्या तरुणाचं नाव संजय गावस असल्याची प्राथमिक माहिती आहे. अपघातानंतर मृत तरुणापाशी त्याचं ओळखपत्र सापडलं आहे. या ओळखपत्रानुसार संजय हा एका फार्मा कंपनीचा कर्मचारी असल्याचं स्पष्ट झालं आहे. गोव्यात अनेक ठिकाणी झाडे कमकुवत स्थितीत असून त्यामुळे अपघातांची भीती निर्माण झाली आहे. त्यातच ओल्ड गोवा परिसरात झालेल्या अपघाताने (Accident) या झाडांचा प्रश्न ऐरणीवर आला आहे.

दरम्यान थिवी परिसरात बुधवारी दुपारी झालेल्या अपघातात दोन कारगाड्यांची समोरासमोर टक्कर होऊन दोन्ही वाहनांचे मोठ्या प्रमाणात नुकसान झाले. मात्र, स्विफ्ट कार आणि स्कॉर्पिओ या दोन्ही वाहनांतील कुणालाही दुखापत झालेली नाही. माडेल-थिवी येथील मुख्य रस्त्यावर हा अपघात (Accident) झाला. धावत्‍या स्विफ्ट कारचे स्टेअरिंग लॉक झाल्याने हा अपघात घडला. त्‍यात स्विफ्ट कारच्‍या दर्शनी भागाचे तर स्कॉर्पिओच्या दरवाजाच्या बाजूने नुकसान झाले आहे.