थिवी येथे अपघातात दोन गाड्यांचे नुकसान

म्हापसा: थिवी येथे ‘आम्यानी’ परिसरात बुधवारी दुपारी झालेल्या अपघातात दोन कारगाड्यांची समोरासमोर टक्कर होऊन दोन्ही वाहनांचे मोठ्या प्रमाणात नुकसान झाले. मात्र, स्विफ्ट कार (जीए 04 ई 3290) व स्कॉर्पिओ (जीजे 03 बीए 2924) या दोन्ही वाहनांतील कुणालाही दुखापत झालेली नाही.

दोन्ही गाड्यांमध्ये एकेकटाच वाहनचालक होता. माडेल-थिवी येथील मुख्य रस्त्यावर हा अपघात (Accident) झाला. धावत्‍या स्विफ्ट कारचे स्टेअरिंग लॉक झाल्याने हा अपघात घडला. त्‍यात स्विफ्ट कारच्‍या दर्शनी भागाचे तर स्कॉर्पिओच्या दरवाजाच्या बाजूने नुकसान झाले. स्विफ्ट कार घेऊन चालक जवाहर देसाई हे म्हापशाहून साखळीच्या दिशेने जात होते, तर स्कॉर्पिओचा चालक थिवीहून पणजीच्या दिशेने येत होता. माडेल येथे रस्त्यावरील दुभाजक संपताच स्विफ्ट कार निसटून चालकाचा (Driver) गाडीवरील ताबा सुटला व समोरून येणाऱ्या स्कॉर्पिओवर जाऊन जोरदार धडकली. या अपघाताची माहिती मिळतात कोलवाळ पोलिस घटनास्थळी दाखल झाले. कॉन्‍स्‍टेबल रूपेश कोरगावकर यांनी पंचनामा केला व दोन्ही वाहने रस्त्याच्या (Road) बाजूला काढली.