Externment Orders

फसवणूक आणि बेकायदेशीर धर्मांतरणाचा आरोप असलेल्या धर्मगुरु डॉम्निक डिसोझा आणि जुआन मास्कारेन्हस यांना कोर्टाकडून मोठा दिलासा मिळाला आहे. उत्तर गोवा जिल्हाधिकाऱ्यांनी दोघांविरोधात काढलेला तडीपारीचा आदेश मुंबई उच्च न्यायालयाच्या गोवा खंडपीठाने रद्द केला आहे.

जुन्या खटल्यांच्या आधारावर तडीपारीचा आदेश देता येत नाही, असे निरीक्षण न्यायालयाने नोंदवले आहे.

सडये-शिवोली येथील फाईव्ह पिलर्स चर्चचे धर्मगुरु डॉम्निक डिसोझा आणि जुआन यांना उत्तर गोव्यातून सहा महिन्यांसाठी तडीपार करण्याचा आदेश जिल्हाधिकाऱ्यांनी १६ मार्च रोजी दिला होता.

याबाबत तत्कालिन उत्तर गोवा पोलिस अधीक्षक निधीन वाल्सन यांनी जिल्हाधिकाऱ्यांनी पत्र लिहून दोघांना तडीपार करण्याची मागणी केली होती.

सार्वजिनक शांततेचा भंग केल्याप्रकरणी तडीपारीची कारावाई व्हावी अशी मागणी वाल्सन यांनी यापत्रात केली होती. डॉम्निक यांनी फोंड्यातील एका ४० वर्षीय व्यक्तील धर्मांतरासाठी धमकावले होते, असा आरोप त्यांच्या विरोधात आहे. मार्च महिन्यांतच डॉम्निकला म्हापसा पोलिसांनी अटक केली होती.

दरम्यान, डॉम्निक आणि त्याची पत्नी जुआन यांच्या विरोधात तडीपार आदेशाला स्थगिती देण्यास राज्याच्या सचिव आणि संबधित प्राधिकरणाने नकार दिला होता.

तडीपार आदेशावर आज (बुधवारी, दि.08 मे) अंतिम निकाल जाहीर केला असून, दोघांच्या तडीपारीचा आदेश रद्द करण्यात आला आहे. सुरु आणि प्रलंबित खटल्यांच्या आधारे तडीपारीचा आदेश जारी करता येत नाही, असे निरीक्षण न्यायालयाने नोंदवले आहे.