Goa MLA Disqualification Petition

पणजी: काँग्रेसच्या आठ आमदारांनी भाजपमध्ये प्रवेश केल्यानंतर त्यांना अपात्र ठरवण्याची याचिका फेटाळण्याच्या गोवा विधानसभेच्या अध्यक्षांच्या निर्णयाला आव्हान देणारी काँग्रेसची याचिका सर्वोच्च न्यायालयाने शुक्रवारी (१३ डिसेंबर २०२४) फेटाळली.

मुख्य न्यायमूर्ती संजीव खन्ना आणि न्यायमूर्ती संजय कुमार यांच्या खंडपीठाने काँग्रेस नेते गिरीश चोडणकर यांना या निर्णयाला आव्हान देण्यासाठी मुंबई उच्च न्यायालयाच्या गोवा खंडपीठात जाण्यास सांगितले आहे.

गोवा विधानसभेचे सभापती रमेश तवडकर यांनी भाजपमध्ये प्रवेश केलेल्या आठ आमदारांना अपात्र ठरवण्याची काँग्रेसची याचिका ०१ नोव्हेंबर २०२४ रोजी फेटाळली होती. ही अपात्रता याचिका काँग्रेसचे माजी अध्यक्ष गिरीश चोडणकर यांनी दाखल केली होती.

दिगंबर कामत, आलेक्स सिक्वेरा, संकल्प आमोणकर, मायकल लोबो, डिलायला लोबो, केदार नाईक, रुडॉल्फ फर्नांडिस आणि राजेश फळदेसाई यांना अपात्र ठरविण्यासाठी ही याचिका दाखल करण्यात आली होती.

दरम्यान, "निवडून आलेल्या आमदाराचा मूळ राजकीय पक्ष इतर कोणत्याही राजकीय पक्षात विलीन झाल्यास, सदस्य अपात्र होणार नाही. मग तो विलीनीकरणासोबत असो वा असहमत असो. विलीनीकरणाच्या बाबतीत अपात्रतेचे नियम लागू होणार नाहीत, असा निर्णय सभापती रमेश तवडकर यांनी चोडणकर यांची याचिका फेटाळून लावताना दिला होता.