डिचोली: डिचोलीतील ‘खाण ब्लॉक’ कोणाच्याही ताब्यात गेला, तरी सेझाच्या कामगारांना सेवेत घेणे संबंधित कंपनीला बंधनकारक करण्यात येईल. त्यामुळे कामगारांनी ‘घाबरू नये’, असे मुख्यमंत्री डॉ. प्रमोद सावंत यांनी सेझा कामगारांना आश्वासन दिले.

( Bicholim worker is satisfied with the e-auction process of mining block)

‘रिट्रेचमेंट’संबंधी कायद्याची लढाई जिंकलेल्या डिचोलीतील सेझा कामगारांना आता भवितव्याबाबत आशादायक किरण दिसू लागला आहे. त्यातच डिचोलीतील खाण ब्लॉकची ई-लिलाव प्रक्रिया मार्गी लागल्यानेही या कामगारांच्या आशा अधिकच पल्लवीत झाल्या आहेत. या पार्श्वभूमीवर सेझाच्या कामगारांनी आज मुख्यमंत्री डॉ. सावंत यांची साखळी येथील रवींद्र भवनात भेट घेऊन त्यांना धन्यवाद दिले. मुख्यमंत्री डॉ. सावंत यांनीही या कामगारांना पुन्हा एकदा सकारात्मक आश्वासन दिले.

300 कामगारांनी मुख्यमंत्र्यांची भेट घेत व्यक्त केले समाधान

‘एम्प्लॉईज युनियन ऑफ सेसा मायनिंग वर्कर्स’ या कामगार संघटनेचे कायदा सल्लागार ॲड. अजय प्रभुगावकर यांच्या नेतृत्वाखाली कामगार संघटनेचे अध्यक्ष नीलेश कार्बोटकर, किशोर लोकरे, नारायण गावकर, महेश होबळे, दीपक पोपकर आदी पदाधिकाऱ्यांसह 300 हून अधिक कामगारांनी आज मुख्यमंत्री डॉ. सावंत यांची भेट घेऊन समाधान व्यक्त केले.