डिचोली: डिचोली शहरात पुन्हा एकदा मंदिरे फोडणारी टोळी सक्रिय झाली आहे, गुरुवारी मध्यरात्री शहरातील आतीलपेठ परिसरातील ‘वृंदावन अपार्टमेंट’ मधील श्री शिवलिंग मंदिरातील फंडपेटी फोडून आतील रोखड लंपास केली. चोरांनी मंदिराच्या डाव्या बाजूने असलेल्या फाटकाचे कुलूप तोडून आत प्रवेश केला होता. त्यांच्या हाती मोठेसे घबाड लागले नसले, तरी फंडपेटी फोडून त्यातील रोकड लंपास केली.

शुक्रवारी सकाळी पुजारी मंदिरात आले असता, चोरीचा हा प्रकार लक्षात आला. या घटनेची माहिती मिळताच पोलिसांनी घटनास्थळी जाऊन पंचनामा केला. याप्रकरणी देवस्थानतर्फे डिचोली पोलिसात रीतसर तक्रार करण्यात आल्याचे देवस्थानचे अध्यक्ष दिगंबर परब आणि दिगंबर मालवणकर यांनी सांगितले.

अडीच महिन्यांत सात मंदिरे लक्ष्य

गेल्या अडीच महिन्यांपासून चोरांनी डिचोली शहरात धुमाकूळ घातला आहे. जून महिन्यात एकाच रात्री शहरातील चार मंदिरे फोडली होती. आता चतुर्थीच्या धामधुमीत चोरांनी पुन्हा एकदा आपल्या कारवाया सुरु केल्या आहेत. या प्रकारामुळे शहरात खळबळ माजली आहे. डिचोलीत पुन्हा मंदिरे फोडणारी टोळी कार्यरत झाली असावी, असा संशय वर्तविण्यात येत आहे. डिचोली शहरात रात्रीच्यावेळी पोलिस गस्त ठेवावी, अशी मागणी होत आहे.