डिचोली: पार्क केलेल्या मोटारगाडीतून मोबाईल फोन आणि अन्य साहित्य मिळून २.६२ लाख रुपये किमतीचा ऐवज चोरणाऱ्या संशयित युवकाच्या मुसक्या आवळण्यात डिचोली पोलिसांना यश आले आहे. अटक करण्यात आलेल्या संशयित युवकाचे नाव श्रीकांत सखू राठोड (२६) असे असून, तो न्यू-वाडे-वास्को येथील रहिवासी आहे.

संशयित युवकाकडून चोरलेला मोबाईल तसेच ही चोरी करण्यासाठी वापरलेली एक कार जप्त केली आहे. पोलिसांनी संशयित युवकाला न्यायालयासमोर हजर केले असता, त्याला तीन दिवस पोलिस कोठडीत ठेवण्याचा आदेश देण्यात आला आहे. चोरीची ही घटना गेल्या जून महिन्यात हरवळे येथे श्री रुद्रेश्वर देवस्थान परिसरात घडली होती.