डिचोली : गेल्या आठवड्यापासून बेपत्ता असलेली हातुर्ली-मये येथील ७० वर्षीय महिला अखेर बेळगावी येथे सापडली. या महिलेला बेळगावीहून गोव्यात आणले असून, त्या सुखरूप आहेत, अशी माहिती नातलगांकडून मिळाली आहे.

बेपत्ता महिलेचा शोध घेण्यासाठी बेळगावी पोलिस तसेच तेथील युवकांसह स्थानिकांनी बहुमूल्य सहकार्य केल्याची माहिती नातलगांनी दिली. हातुर्ली येथील चंद्रिका (मंगला) फोंडू शिरोडकर ह्या गेल्या बुधवारी (ता. १०) डिचोलीच्या आठवडी बाजारासाठी घराबाहेर पडल्या होत्या.

त्या घरी परतलेल्याच नव्हत्या. चंद्रिका बेपत्ता झाल्यापासून त्यांचा शोध सुरु होता. घरच्यांसह नातलगांकडून तिचा मयेसह डिचोली, साखळी, दोडामार्ग आदी परिसरात शोध घेतला होता. मात्र त्या सापडत नव्हत्या.

नातलगांनी डिचोलीतील शहरातील सीसीटिव्ही फुटेज तपासून पाहिले असता, चंद्रिका या कर्नाटकातील बेळगावी जाणाऱ्या बसमध्ये चढल्याचे दिसून आले. मंगळवारी सकाळी तिच्या नातलगांनी बेळगावी गाठून त्यांचा शोध सुरु केला होता. तेथील पोलिसांनाही खबर देण्यात आली.