डिचोली: डिचोलीच्या आयडीसी परिसरातील कातरवाडा येथील रस्त्याचा वाद आता चिघळण्याची शक्यता निर्माण झाली आहे. याबाबत ग्रामस्थ संतप्त झाले आहेत.

रस्त्यासाठी दावा करण्यात येत असलेली मालमत्ता ही आमच्या पूर्वजांनी राखून ठेवलेली शेतजमीन आहे. रस्ता झाला नाही, तर आंदोलन करण्याची धमकी देणाऱ्यांना आम्ही भीक घालत नाही, असे गावकरांनी सांगून, कोणाला काय करायचे ते करा.

मात्र रस्त्यासाठी आमची एक इंचही जागा सोडणार नाही, असे श्यामू गावकर, लक्ष्मीकांत परब, निकिता गावकर, माधवी परब आदी ग्रामस्थ गावकरांच्या गटाने स्पष्ट केले आहे. कातरवाडा येथे रस्ता व्हावा, अशी त्या परिसरात राहणाऱ्या लोकांची आहे.

२५ हून अधिक ग्रामस्थ गावकर उपस्थित होते. सध्या जी जमीन ओसाड दिसत आहे, ती आमची शेतजमीन आहे. आम्हीही शेती करण्याचा निर्णय घेतला आहे, असे माधवी परब हिने सांगितले.

‘वर्क ऑर्डर’ कशी?

रस्त्यासाठी आम्ही कोणीच ‘ना हरकत’ दाखला दिला नाही. त्यामुळे सार्वजनिक बांधकाम खात्यातर्फे वर्क ऑर्डर कशी काढण्यात आली, असा प्रश्न लक्ष्मीकांत परब, माधवी परब आदींनी उपस्थित केला. मालमत्ता आमची आहे. तेव्हा रस्त्यासाठी कोणी धमकी दिली, तर त्याला प्रत्युत्तर देण्यात येईल, असा इशारा निकिता गावकर हिने दिला.